Read La Bible en Malgache Joba 21 Bible Online

Joba 21 - La Bible en Malgache bible

Joba 21

¹Dia namaly i Joba hoe:

²Mihainoa tsara ny teniko ary aoka izany no ho fampiononanareo ahy.

³Mandefera amiko ianareo fa mba hiteny kosa aho izao; ary rehefa tapitra ny teniko dia mahazo mandatsalatsa ihany indray ianareo.

⁴Raha ny amiko, moa ny ataon’ny olona va no itarainako? Ary raha izany, nahoana no hahalefitra ny fanahiko?

⁵Jereo aho dia aoka ho talanjona ianareo ary mitampena vava.

⁶Eny, raha mahatsiaro izany aho dia raiki-tahotra sady toran-kovitra ny tenako.

⁷Nahoana no velona ny ratsy fanahy ka sady tratra antitra no vao mainka mitombo hery?

⁸Ny zanany koa dia mitomoetra tsara eo anatrehany ary ny zafiny dia hitan’ny masony.

⁹Ny ankohonany dia miadana, tsy misy mampitahotra, ary ny tsorakazon’Andriamanitra dia tsy mamely azy.

¹⁰Mampiteraka ny ombilahiny ka mahavanona, miteraka ny ombivaviny ka tsy mamotsotra.

¹¹Mamela ny zanany madinika sy ny ankizilahiny hikorana toy ny ondry aman’osy izy.

¹²Mihoby mitondra ampongatapaka sy lokanga izy ary mifaly amin’ny feon-tsodina.

¹³Mandany ny androny amin’ny fahafinaretana izy; amin’ny indray mipy maso no idinany any amin’ny fitoeran’ny maty*.

¹⁴Kanefa anie dia ireo no manao amin’Andriamanitra hoe: Mialà aminay! Fa tsy mba irinay ny hahafantatra ny lalanao.

¹⁵Zinona izay Tsitoha no hotompoinay? Ary inona no soa ho azonay raha mivavaka Aminy?

¹⁶Indro, tsy eo am-pelatanany ny fahafinaretany! Lavitra ahy ny fisainan’ny ratsy fanahy!

¹⁷Impiry moa no mba maty ny jiron’ny ratsy fanahy sy misy ny loza manjo azy ary anomezan’Andriamanitra ny anjarany noho ny fahatezerany?

¹⁸Moa va izy tonga tahaka ny mololo voatetika indaosin’ny rivotra sy tahaka ny akofa entin’ny tafio-drivotra?

¹⁹Andriamanitra, hoy ianareo, mbola hampijaly ny zanany noho ny heloky ny rainy! Tsia! Fa ny tenan’ireny ihany no tokony handray ny valiny ary aoka ho fantany izany!

²⁰Aoka ny masony ihany no hahita ny fahalevonany ary aoka ny tenany ihany no hisotro ny fahatezeran’ny Tsitoha.

²¹Fa mampaninona azy moa ny amin’ny taranany mandimby azy raha efa voafetra ny isan’ny androny?

²²Moa Andriamanitra va no hampianarina fahalalana, nefa Izy aza no mitsara ny any an-danitra?

²³Maty ny iray raha mbola tao anatin’ny tanjany sady niadana tanteraka tsy nanana ahiahy;

²⁴feno tavy ny andilany ary vonton-tsoka ny taolany.

²⁵Ny iray kosa dia maty ao anatin’ny fangidiam-panahy ka tsy mba nanandrana soa akory.

²⁶Samy mandry ao amin’ny vovoka izy roa tonta ka rakotry ny olitra ny tenany.

²⁷Indro, fantatro ny hevitrareo sy ny saim-petsy amelezanareo ahy;

²⁸fa hoy ianareo: Aiza ny tranon’ny andriana? Ary aiza ny tranolay fitoeran’ny ratsy fanahy?

²⁹Kanefa tsy mba nanontany ny mpandalo va ianareo? Ary tsy mba noheverinareo va ny zavatra ambarany?

³⁰Amin’ny andro hahitan-doza dia voaaro ihany ny ratsy fanahy ary amin’ny andron’ny fahatezerana dia mahita fialofana izy.

³¹Iza no hanambara mifanatrika aminy ny lalany? Ary raha misy zavatra nataony, iza no hamaly azy amin’izany?

³²Entina ho eny an-tany fandevenana izy ka misy miambina eo amin’ny fasana;

³³mamy aminy ny bainga any an-dohasaha; ny olona rehetra dia manotrona nanaraka azy ary maro tsy hita isa no efa nialoha lalana.

³⁴Endre! Ity ianareo mba mampionona ahy foana! Ary izay sisa amin’ny teny avalinareo dia lainga ihany!