Read La Bible en Malgache Joba 22 Bible Online

Joba 22 - La Bible en Malgache bible

Joba 22

¹Dia nandray fitenenana i Elifaza temanita hoe:

²Mahasoa an’Andriamanitra va ny olona, nefa ny olon-kendry aza dia tsy mahasoa afa-tsy ny tenany ihany?

³Mampaninona ny Tsitoha moa raha marina ianao sa misy tombony ho Azy raha ataonao tsy misy diso ny alehanao?

⁴Moa ny fahatahoranao Azy va no ananarany anao sy ifanatrehany aminao amin’ny fitsarana?

⁵Tsy be va ny faharatsianao sady tsy hita isa ny helokao?

⁶Fa efa naka antoka tsy amin’antony tamin’ny rahalahinao ianao ka nanendaka ny akanjon’ny mahantra.

⁷Tsy nanome rano hosotroin’ny mangetaheta ianao sady tsy nahafoy hanina ho an’ny noana.

⁸Fa ny olona be sandry ihany no nanana ny tany; ary ny manankaja ihany no nitoetra teo.

⁹Efa nampialainao maina ny mpitondratena ary notapahina ny sandrin’ny kamboty.

¹⁰Koa noho izany dia misy fandrika manodidina anao ary misy zava-mahatahotra mampihorohoro anao tampoka.

¹¹Moa tsy hitanao va ny haizina sy ny rano mandriaka mandifotra anao?

¹²Tsy avo tahaka ny lanitra va Andriamanitra? Jereo ny haavon’ny kintana, endre ny haavony!

¹³Nefa hoy ianao: Ataon’Andriamanitra ahoana no fahafantatra? Mahay mitsara any ankoatra ny rahona maizina va Izy?

¹⁴Manakona Azy ny rahona matevina ka tsy mahita Izy; mandehandeha eny amin’ny lanitra Izy.

¹⁵Moa hizotra amin’ny lalana izay nalehan’ny olona fahagola va ianao, dia ilay nalehan’ny olona ratsy fanahy?

¹⁶Nesorina alohan’ny androny izy ireny ka nindaosin’ny riaka ny fanorenany,

¹⁷dia ireo izay niteny tamin’Andriamanitra hoe: Mialà aminay! Ary inona no azon’ny Tsitoha atao ho anay?

¹⁸Kanefa Izy no efa nameno zava-tsoa ny tranony. Lavitra ahy ny fisainan’ny ratsy fanahy!

¹⁹Mahita ny marina ka mifaly ary ny tsy manan-tsiny dia mihomehy ireny hoe:

²⁰Marina tokoa fa rava ny fahavalontsika ary ny harenany betsaka dia levon’ny afo.

²¹Mifankazara amin’ny Tsitoha ianao dia hiadana; izany no hahatafaverina ny fahasambarana aminao.

²²Miangavy anao aho, mandraisa fampianarana avy amin’ny vavany ary alatsaho ao am-ponao ny teniny.

²³Raha miverina amin’ny Tsitoha ianao dia ho tafaorina indray; eny, raha ampanalavirinao ny tranolainao ny heloka.

²⁴Ario eny amin’ny vovoka ny akoram-bolamena sy ny akoram-bolafotsy, eny, ario eny amin’ny vato eny an-dohasahan-driaka ny volamena avy any Ofira;

²⁵fa ny Tsitoha no ho akoram-bolamenanao sy akoram-bolafotsinao; ary ho volafotsy mamirapiratra ho anao.

²⁶Fa amin’izany dia hiravoravo amin’ny Tsitoha ianao ka hanandratra ny tavanao amin’Andriamanitra.

²⁷Raha mifona Aminy ianao dia hihaino anao Izy ary hanefa ny voadinao ianao.

²⁸Ary raha misy kasainao hatao dia hotanterahina aminao ary hamirapiratra amin’ny lalanao ny mazava.

²⁹Raha misy mietry dia hataonao hoe: Misandrata! Fa ny manetry tena no hovonjeny.

³⁰Hanafaka na dia ny olona meloka aza Izy; eny, ny fahadiovan’ny tananao no hamonjena azy.