Read La Bible en Malgache Joba 23 Bible Online

Joba 23 - La Bible en Malgache bible

Joba 23

¹Dia namaly i Joba hoe:

²Izao dia mbola fikomiana ihany ny fitarainako; ny tanako dia manampina ny fisentoako.

³Enga anie ka ho fantatro izay hahitako Azy ka ho tonga any amin’ny fitoerany aza!

⁴Dia ho nandahatra ny teniko eo anatrehany aho ka nofenoiko ny teny alahatro ny vavako;

⁵ary nahalala izay teny havaliny ahy aho sy namantatra izay holazainy amiko.

⁶Amin-kery lehibe va no handaharany teny amiko? Tsia, fa Izy indrindra no hihaino ahy.

⁷Fa amin’izany dia olona marina no hifandahatra Aminy ka hanan-drariny mandrakizay amin’ny Mpitsara ahy aho.

⁸Nefa raha miantsinanana aho, tsy any Izy; ary raha miankandrefana aho, tsy hitako Izy;

⁹mianavaratra any amin’izay iasany aho nefa tsy tazako Izy; mivily any atsimo Izy nefa tsy hitako.

¹⁰Mahalala ny lalana falehako anefa Izy; raha hozahany toetra aho dia hivoaka tahaka ny volamena.

¹¹Ny tongotro dia nifikitra tamin’ny lalany; eny, ny lalany no nizorako tsara ka tsy nivily aho.

¹²Ny didin’ny molony dia tsy mba nialako; ny tenin’ny vavany dia notandremako mihoatra noho ny faniriako.

¹³Nefa tsy miova saina Izy, koa iza no mahasakana Azy? Fa na inona na inona zavatra iriny dia ataony.

¹⁴Eny, manatanteraka izay voatendry ho ahy Izy ary zavatra maro toy izany no ao Aminy.

¹⁵Koa izany no mampangovitra ahy eo anatrehany; raha misaintsaina izany aho dia matahotra Azy.

¹⁶Fa Andriamanitra no mandemy ny foko ary ny Tsitoha no mampangovitra ahy.

¹⁷Tsy ny fahamaizinana anefa no hampangina ahy na ny haizim-pito izay manarona ny tavako.