Read La Bible en Malgache Joba 24 Bible Online

Joba 24 - La Bible en Malgache bible

Joba 24

¹Nahoana no tsy misy fotoanandro voatendrin’ny Tsitoha, ary nahoana no tsy hitan’ny mahalala Azy izany androny izany?

²Misy mamindra ny fanamarihana ny sisintanin’olona sy mangalatra omby aman’ondry sady miandry azy.

³Mandroaka ny borikin’ny kamboty izy ireny ary maka ny ombin’ny mpitondratena ho antoka.

⁴Manosika ny mahantra hiala amin’ny lalana izy ka miery azy avokoa ny ory amin’ny tany.

⁵Indro, tahaka ny fivoakan’ny borikidia any an-tany efitra no fiaingan’ny mahantra amin’ny masoandro miposaka ho amin’ny asany mba hiremby; ny tany ngazana no ahazoany hanina ho an’ny zanany.

⁶Any an-tsaha izy ireny no maka vilona sy mitsimpontsimpona ny voaloboky ny ratsy fanahy.

⁷Mandry mitanjaka amin’ny alina izy satria tsy manan-damba sady tsy manana firakotra ho amin’ny hatsiaka;

⁸kotsan’ny ranonoram-baratra any an-tendrombohitra izy ka mitampisaka amin’ny vatolampy satria tsy manam-pialofana.

⁹Sarihina eo am-pinonoana ny kamboty ary akana antoka ny ory.

¹⁰Mandeha mitanjaka izy ireny fa tsy manan-kitafy ary noana eo am-pitondrana ny amboaram-bary;

¹¹manamboatra diloilo any amin’ny sahan’ny hafa izy; manosihosy ny famiazam-boaloboka izy nefa mangetaheta ihany.

¹²Mitrona ny miala aina ao an-tanàna ary mitaraina ny fanahin’ny voalefona; nefa tsy ahoan’Andriamanitra akory ny ratsy mitranga!

¹³Ireny no mpikomy amin’ny mazava; tsy mba mihevitra ny lalany izy na mitoetra eo amin’ny alehany.

¹⁴Raha vao mangiran-dratsy dia mifoha ny mpamono olona; mamono ny ory sy ny malahelo izy; nony alina izy dia tahaka ny mpangalatra.

¹⁵Ny mason’ny mpijangajanga dia miandry ny maizimaizina ka hoy izy: Tsy misy hahita ahy, dia manisy sarona ny tavany izy.

¹⁶Misy mamaky trano nony maizina; nefa nony antoandro dia miery izy; tsy mahalala ny mazava izy.

¹⁷Amin’izy rehetra dia aloky ny fahafatesana ny maraina satria hitany ao ny fampahatahoran’ny aloky ny fahafatesana.

¹⁸Mitsinkafona paohin’ny rano izy; voaozona ny fonenany eo amin’ny tany; tsy mivily ho amin’ny lalana mankeny amin’ny tanim-boaloboka izy.

¹⁹Toy ny andevonan’ny andro maina sy ny andro mafana ny rano avy amin’ny orampanala no andevonan’ny fitoeran’ny maty* ny mpanota.

²⁰Manadino azy ny kibo nitondra azy; manjary hanim-py ho an’ny olitra izy ka tsy tsarovana intsony! Tapaka tahaka ny hazo ny ratsy fanahy,

²¹dia ilay mikarakara ny momba izay tsy niteraka nefa tsy mba manisy soa ny mpitondratena.

²²Kanefa halavain’Andriamanitra amin’ny heriny ny andron’ny olo-mahery; mitsangana indray ireo na dia tsy nanampo izay ho velona intsony aza.

²³Ataony mandry fehizay sy tsara tohana izy sady tsinjoviny mandrakariva ny lalany.

²⁴Nasandratra izy, kanjo vetivety dia tsy eo intsony; midaboka toy ny amboara jinjaina rehetra izy ary tangosana tahaka ny salohim-bary.

²⁵Raha tsy izany dia iza no hamaky lainga ahy ka hampiseho ny teniko ho tsinontsinona?