Read La Bible en Malgache Joba 26 Bible Online

Joba 26 - La Bible en Malgache bible

Joba 26

¹Dia namaly i Joba hoe:

²Endre! Izato fanohananao ny tsy manan-kery sy izato fampatanjahanao ny sandry malemy!

³Mahay manolotsaina ny tsy hendry ianao ary mampahafantatra fahendrena betsaka!

⁴Iza anefa no andaharanao teny? Ary avy amin’iza ny fanahiny izay mivoaka avy aminao?

⁵Ny matoatoa dia mitaintaina any ambanin’ny rano sy izay monina any.

⁶Ny fitoeran’ny maty* dia mihanjahanja eo anatrehany ary tsy misy rakotra tamin’ny fandringanana.

⁷Mamelatra ny lanitra avaratra eny ambonin’ny habakabaka Izy ary manantona ny tany eo amin’ny tsy misy na inona na inona.

⁸Fonosiny ao anatin’ireo rahony matevina ny rano nefa ny fanambanin’ny rahona dia tsy mety triatra.

⁹Manakona ny sezafiandrianany tsy ho hitantsika Izy amin’ny amelarany ny rahony hanarona azy.

¹⁰Asiany faritra boribory eny ambonin’ny rano, eo amin’izay ihaonan’ny mazava sy ny maizina.

¹¹Ny andry iorenan’ny lanitra dia mihozongozona sady ankona noho ny teny mafy ataony.

¹²Ny heriny no entiny mampanonja ny ranomasina ary ny fahendreny no anorotoroany an’i Rahaba[2];

¹³ny fofonainy no mampadio ny lanitra ho mamirapiratra; ny tanany no nitomboka ny menarana mandositra.

¹⁴Indro ireny rehetra ireny dia ny ivelambelany amin’ny asany ihany, ako mamelovelo izay andrenesantsika Azy ihany; fa raha ny fikotrokotroky ny heriny, iza moa no mahatakatra izany?