Read La Bible en Malgache Joba 27 Bible Online

Joba 27 - La Bible en Malgache bible

Joba 27

¹Dia mbola nandroso nanao oha-teny ihany i Joba hoe:

²Raha velona koa Andriamanitra izay efa nandà tsy hanome ahy ny rariny sy ny Tsitoha izay efa nampangidy ny aiko,

³fa mbola ato amiko ihany ny aiko ary mbola eo am-bavoroko ny fofonaina avy amin’Andriamanitra,

⁴dia tsy hanao teny tsy marina ny molotro ary tsy hanonom-pitaka ny lelako.

⁵Sanatria raha hanaiky ny anareo ho marina aho! Mandra-pialan’ny aiko dia tsy hanaiky ny tenako ho manan-tsiny aho.

⁶Ny fahamarinako dia hazoniko mafy ka tsy ho foiko; ny foko dia tsy manome tsiny ahy akory na dia ny amin’ny androko iray monja aza.

⁷Aoka ho hita fa ratsy fanahy ny fahavaloko ary olon-tsy marina izay mitsangana manohitra ahy!

⁸Fa inona no tombony antenain’ny mpihatsaravelatsihy rehefa tsoahan’Andriamanitra ny ainy?

⁹Hihaino ny fitarainany va Andriamanitra raha ozoim-pahoriana izy?

¹⁰Hahita haravoravoana amin’ny Tsitoha va izy? Hahazo miantso an’Andriamanitra mandrakariva va izy?

¹¹Hampianatra anareo ny amin’ny tanan’Andriamanitra aho ary tsy hanafenako anareo ny hevitry ny Tsitoha.

¹²Indreo ianareo rehetra dia samy efa nahita izany; koa nahoana ianareo no mandany andro amin’ny hevi-poana?

¹³Izao no anjaran’ny ratsy fanahy avy amin’Andriamanitra sy lovan’ny mpampihorohoro raisiny avy amin’ny Tsitoha:

¹⁴Na dia mihamaro aza ny zanany dia ho an’ny sabatra ihany ireny. Ary ny zaza aterany dia tsy ho voky hanina;

¹⁵ny ankohonany sisa dia hasitrik’i Rafahafatesana ary tsy hisaona azy ny mpitondratena navelany;

¹⁶na dia mahary volafotsy ohatra ny vovoka aza izy ary mahangona fitafiana ohatra ny tanimanga;

¹⁷eny, manangona ihany izy, nefa ny marina no hitafy izany, ary ny tsy manan-tsiny no hizara ny volafotsy.

¹⁸Manao ny tranony tahaka ny an’ny lolofotsy izy ary tahaka ny trano rantsan-kazo ataon’ny mpiandry voly;

¹⁹Ao ihany ny harenany rehetra raha vao mandry izy, nefa nony ahirany ny masony dia tsy ao intsony ireny.

²⁰Mahatratra azy tahaka ny riaka ny fampahatahorana; nony alina dia paohin’ny tafio-drivotra izy;

²¹Manainga azy sy mahalasa azy ny rivotra avy any atsinanana ka mipaoka azy hiala amin’ny fitoerany;

²²asian’ny olona ny tsipìka izy ka tsy iantrany, dia voatery mandositra ho afaka amin’ny tanany izy.

²³Tehafin’ny olona tanana izy sady isiafany ka ampialainy amin’ny fonenany.