Read La Bible en Malgache Joba 28 Bible Online

Joba 28 - La Bible en Malgache bible

Joba 28

¹Fa misy tany fihadiana volafotsy ary misy toerana fandiovana volamena.

²Ny vy dia alaina avy amin’ny vovoka ary ny varahina dia arendrika avy amin’ny vato.

³Ny mpihady vola dia mampisava ny maizina ka mikaroka hatrany amin’ny faran’ny lalina any ny vato any anatin’ny haizim-pito sy ny aloky ny fahafatesana;

⁴mihady lavaka lavitry ny fonenan’ny olona izy; mievingevina ny tongony, mihantona sy mitsingevaheva any ambany lavitra ny olona any.

⁵Ny tany no iavian’ny hanina, nefa any anatiny ambany any izy dia avadika toy ny amin’ny afo.

⁶Toeran’ny safira ny vatony ary misy vovo-bolamena ao aminy.

⁷Tsy fantatry ny vorona mpihaza ny lalana mankany ary tsy hitan’ny mason’ny voromahery;

⁸tsy nodiavin’ny mpiremby ary tsy mba nalehan’ny liona masiaka.

⁹Manatsotra ny tanany amin’ny vatokaranana ireo ary mamadika ny tendrombohitra hatramin’ny fotony;

¹⁰ny vatolampy dia tatahany hatao lalan-drano ary izay zava-tsoa rehetra dia hitan’ny masony avokoa.

¹¹Tampenany ny lalan-drano mba tsy hisy mitete ary izay zavamiafina dia avoakany ho amin’ny mazava.

¹²Fa aiza kosa no hahitana ny fahendrena? Ary aiza ny fitoeran’ny fahalalana?

¹³Tsy misy zanak’olombelona mahalala ny vidiny ary tsy hita eo amin’ny tanin’ny velona izy.

¹⁴Hoy ny lalina: Tsy ato anatiko izy. Ary hoy ny ranomasina: Tsy ato amiko izy.

¹⁵Tsy azo atakalo volamena tsara izy ary ny volafotsy dia tsy azo lanjaina ho vidiny;

¹⁶ny volamena avy any Ofira dia tsy ampy ho tombany, na ny berila sarobidy na ny safira aza.

¹⁷Ny volamena sy ny fitaratra dia tsy azo ampitahaina aminy ary tsy azo atakalo firavaka volamena tsy miharo izy.

¹⁸Tsy tokony hotsaroana akory ny voahangy sy ny vato kristaly, fa ny fahazoana fahendrena dia mihoatra noho ny voahangy.

¹⁹Ny topaza avy any Kosy dia tsy azo ampitahaina aminy ary tsy mahatakalo azy ny tena volamena tsara.

²⁰Dia avy aiza ary ny fahendrena? Ary aiza ny fitoeran’ny fahalalana?

²¹Miafina amin’ny mason’ny velona rehetra izany ary takona amin’ny voromanidina.

²²Hoy ny Fandringanana sy Rafahafatesana: Ny sofinay ihany no nandrenesanay ny filazana azy.

²³Andriamanitra ihany no mahalala ny lalana ho any aminy ary Izy no mahafantatra ny itoerany;

²⁴fa Izy no mitsinjo hatrany amin’ny faran’ny tany ary mahatazana manerana izao ambanin’ny lanitra rehetra izao

²⁵ka manendry ny lanjan’ny rivotra ary mamatra ny rano amin’ny famarana.

²⁶Tamin’ny nanaovany lalàna ho an’ny ranonorana sy lalana halehan’ny tselatry ny kotrokorana

²⁷dia nahita azy Izy ka nanambara azy; eny, nametraka ny fanorenany Izy sady namantatra azy.

²⁸Dia hoy Izy tamin’ny olombelona: Indro, ny fahatahorana ny Tompo no fahendrena ary ny fialana amin’ny ratsy no fahalalana.