Read La Bible en Malgache Joba 29 Bible Online

Joba 29 - La Bible en Malgache bible

Joba 29

¹Dia mbola nandroso nanao oha-teny ihany i Joba hoe:

²E! Raha izao moa aho no tahaka ny tamin’ireny volana lasa ireny! Dia tahaka ny tamin’ny andro niarovan’Andriamanitra ahy!

³Fony mbola nazava teo ambonin’ny lohako ny jirony ary ny fahazavany no nandehanako tao amin’ny maizina!

⁴Eny, tahaka ny toetrako fony mbola fararanoko, raha niseho teo ambonin’ny tranolaiko ny fisakaizan’Andriamanitra;

⁵fony mbola nomba ahy ny Tsitoha ary nanodidina ahy ny zanako;

⁶fony mbola nanasa ny tongotro tamin’ny rononomandry aho ary namoaka reniranon’ny diloilo ho ahy ny vatolampy!

⁷Raha niainga niakatra ho eo amin’ny vavahadin’ny tanàna aho ka nametraka ny akalako teo an-kianja

⁸dia nahita ahy ny zatovo ka niafinafina ary nitsangana ny fotsy volo dia naharitra nijoro;

⁹nangina tsy niteny ny lehibe ka nitampim-bava;

¹⁰tsy sahy niteny ny mpanapaka ary ny lelany dia niraikitra tamin’ny lanilaniny.

¹¹Izay sofina nandre dia niteny ahy hoe sambatra ary izay maso nahita dia vavolombelona ho ahy

¹²satria namonjy ny ory izay nitaraina aho sy ny kamboty izay tsy nanan-kamonjy.

¹³Ny fisaoran’izay efa ho faty dia tonga tamiko ary ny fon’ny mpitondratena dia nampifaliko.

¹⁴Nitafy fahamarinana aho ka mba nitafy ahy kosa izy. Eny, tahaka ny akanjobe sy fehiloha ny rariny izay nananako.

¹⁵Tamin’izay aho dia maso ho an’ny jamba ary tongotra ho an’ny mandringa;

¹⁶ray ho an’ny malahelo aho ary ny adin’ny olona tsy fantatro aza dia nohadihadiako.

¹⁷Namotika ny nifin’ny ratsy fanahy aho ka nandrombaka ny babo teo am-bavany.

¹⁸Dia hoy aho: Eo amin’ny akaniko ihany no hialako aina ary hanamaro ny androko toy ny fasika aho.

¹⁹Hamahatra eo amin’ny rano aho ary ny ando dia hitoetra amin’ny sampako mandritra ny alina.

²⁰Ho vaovao amiko lalandava ny voninahitro ary ny tsipìkako dia hihahenjana eny an-tanako.

²¹Nihaino ahy ny olona dia niandry ka nangina tamin’ny fanolorako saina izy.

²²Rehefa niteny aho dia tsy mba namaly intsony izy ary nitetevan’ny teniko izy.

²³Niandry ahy toy ny fiandry ny ranonorana izy ary nitanatana vava toy ny fiandry ny faraorana.

²⁴Raha nitsiky taminy aho dia tsy sahy nino izy ary tsy nisy navelany ho very ny hazavana tamin’ny tarehiko.

²⁵Nifidy ny lalana halehany aho ka nipetraka ho mpitarika azy; eny, nitoetra toy ny mpanjaka teo amin’ny miaramila sy toy ny mpampionona ny misaona aho.