Read La Bible en Malgache Joba 30 Bible Online

Joba 30 - La Bible en Malgache bible

Joba 30

¹Fa ankehitriny kosa dia mihomehy ahy na dia izay mbola zandriko aza, dia ny zanak’ireo izay nolaviko tsy ho isan’ny amboa miandry ny ondriko akory.

²Koa hataoko inona moa ny herin-tsandrin’ireo? Efa very ny fahatanjahany.

³Kaozatra noho ny tsy fisian-kanina sy ny mosary izy ireo; homankomana foana any an-tany karankaina ao amin’ny haizin’ny loza sy ny faharinganana.

⁴Mitsongo anana dia eny amin’ny kirihitrala ireny ary ny fototry ny anjavidy no sakafony.

⁵Roahina tsy ho eo amin’ny olona izy sady akoraina toy ny mpangalatra,

⁶koa eny an-davaka amin’ny moron’ny lohasahan-driaka no itoerany, dia any an-dava-tany sy any an-dava-bato.

⁷Minananana eny amin’ny kirihitrala izy ary mitangorona eny ambanin’ny amiana.

⁸Olom-poana izy ireny sady olona tsy manana anarana akory ka roahina tsy ho eo amin’ny tany.

⁹Ankehitriny anefa dia ataony an-kira aho. Eny, ataony ambentinteniny aho.

¹⁰Ataony toy ny zava-betaveta aho ka halaviriny ary tsy misalasala ny handrora ny tavako izy.

¹¹Koa satria noketrahin’Andriamanitra ny kofehin’ny tsipìkako ka nampietreny aho dia tsy nisy fetrany intsony ny famelezan’ireo ahy.

¹²Mitangorona eo ankavanako izy ireo ka manosika ny tongotro hibolisatra ary manandratra tovon-tany hampidirany loza amiko;

¹³mandrava ny lalako izy ary mitady lalana hanapotehana ahy na dia tsy misy manampy azy aza;

¹⁴toy ny fiditra eo amin’ny banga lehibe no fiaviny ka avy ao amin’ny voarava izy no miriotra.

¹⁵Nitodika hamely ahy ny fampitahorana; nopaohin’ny rivotra ny voninahitro ka levona tahaka ny rahona ny famonjena ahy.

¹⁶Ary ankehitriny, miraraka ny aiko ato anatiko, azon’ny andro fahoriana aho.

¹⁷Amin’ny alina dia samatsamahiny hiala amiko ny taolako ary tsy mitsahatra ireo manotahota ahy ireo.

¹⁸Noho ny hery amelezany ahy dia simba ny akanjoko, manendaka ahy amin’ny vozon-dobaka Izy.

¹⁹Nanipy ahy teo amin’ny fotaka Izy ka tahaka ny vovoka sy ny lavenona aho.

²⁰Mitaraina Aminao aho nefa tsy mihaino ahy Ianao; mijoro eo aho nefa jerenao foana.

²¹Tonga lozabe amiko Ianao; ny herin’ny tananao no andrafianao ahy.

²²Aingainao ho eny amin’ny rivotra aho ka ampitaingeninao azy ary levoninao ao anatin’ny tafio-drivotra mifofofofo aho.

²³Fantatro fa hampodinao any amin’ny fahafatesana aho, dia any amin’ny trano ifamotoanan’ny olombelona rehetra.

²⁴Kanefa tsy manainga ny tanany va ny olona raha ianjeran’ny rava? Ary tsy mitaraina va izy raha tratry ny loza?

²⁵Tsy nitomany ny ory va aho? Tsy nangorakoraka ny mahantra va ny fanahiko?

²⁶Nanantena fahasambarana aho, kanjo ny ratsy no tonga; niandry ny mazava aho, kanjo ny maizina no tonga.

²⁷Tsy mitsahatra mandevilevy ny tsinaiko. Nitsena ahy ny andro fahoriana.

²⁸Mitsaitsaika mitafy lamba fisaonana aho sady tsy mahita masoandro; mitsangana eo am-pivorian’ny olona aho ka mitaraina.

²⁹Tonga rahalahin’ny amboadia aho ary naman’ny aotirisy.

³⁰Mivalomainty ny hoditro sady miendakendaka ary karankaina noho ny hafanana ny taolako.

³¹Nanjary fisaonana ny lokangako ary feon’ny mitomany ny sodiko.