Read La Bible en Malgache Joba 31 Bible Online

Joba 31 - La Bible en Malgache bible

Joba 31

¹Efa nampanekeko ny masoko, koa hataoko ahoana indray no fijery zazavavy?

²Fa raha izany dia inona no anjara avy amin’Andriamanitra any ambony, sy lova avy amin’ny Tsitoha any amin’ny avo?

³Moa tsy loza va no manjo ny ratsy fanahy? Ary tsy loza va no mahazo ny mpanao ratsy?

⁴Moa tsy Andriamanitra va no mijery ny lalako ka manisa ny diako rehetra?

⁵Moa va nandeha tamin’ny fitaka aho na niezaka tamin’ny hafetsena?

⁶Enga anie ka holanjain’Andriamanitra amin’ny mizana tsy mandainga aho dia ho fantany ny tsy fananako tsiny!

⁷Raha toa ka nivily niala tamin’ny lalana ny diako na nanaraka ny masoko ny foko na nisy tsiny niraikitra tamin’ny tanako

⁸dia aoka hamafy aho fa olon-kafa no hihinana ary aoka hofongotra izay namboleko!

⁹Raha toa ka adala tamin’ny vadin’olona ny foko ka namitsaka teo am-baravaran’ny namako aho

¹⁰dia aoka kosa ny vadiko hanodina fikosoham-bary ho an’ny sasany ary aoka ho olon-kafa no handry aminy!

¹¹Fa fahavetavetana izany; eny, heloka tokony hotsarain’ny mpitsara;

¹²fa afo mandevona hatrany amin’ny tanin’ny fandringanana izany ka hanongotra ny vokatro rehetra.

¹³Raha toa ka nandà ny rariny izay an’ny mpanompolahiko na ny mpanompovaviko aho, raha nifamaly tamiko izy,

¹⁴dia inona no hataoko, raha hitsangana Andriamanitra? Ary ahoana no havaliko Azy raha handinika ny raharaha Izy?

¹⁵Fa moa tsy Izay nanao ahy tany an-kibo ihany va no nanao azy ireny koa? Ary tsy Iray ihany va no namorona anay tany am-bohoka?

¹⁶Raha toa ka nandà izay nirin’ny mahantra aho ka namela ny mason’ny mpitondratena hijery foana

¹⁷na nihinana ny sombin-kaniko irery ka tsy mba nanome izay anjaran’ny kamboty,

¹⁸nefa tsy izany, fa hatry ny fony mbola tanora aho no nitaiza azy ireny toy ny ray, ary vao nivoaka ny kibon’ny reniko aho no efa nitari-dalana ny mpitondratena;

¹⁹fa raha toa ka nahita olona efa ho faty noho ny tsy fananana akanjo aho na mahantra tsy manana firakotra,

²⁰moa tsy ho nisaotra ahy va izy satria nafana ny lamosiny ary nanafana azy ny volon’ondriko?

²¹Raha toa ka nanatsotra ny tanako hampahory ny kamboty aho satria hitako fa nisy niandany tamiko teo amin’ny fitsarana

²²dia aoka ny foto-tsandriko hitsoaka hiala amin’ny soroko; eny, aoka ny sandriko ho latsaka hiala amin’ny taolam-panaviko.

²³Fa mampahatahotra ahy ny loza avy amin’Andriamanitra ka tsy mahavita na inona na inona aho noho ny fahalehibiazany.

²⁴Raha toa ka nanao ny volamena ho fanantenako aho na nanonona ny volamena tsara hoe: Ry tokiko ô;

²⁵raha toa ka nifaly noho ny haben’ny fananako sy noho ny nahazoan’ny tanako harena betsaka aho,

²⁶raha toa ka nijery ny masoandro raha izy namirapiratra iny aho, na ny volana raha izy nandeha tamin’ny fangarangarany iny,

²⁷ka voafitaka mangingina ny foko ary nanoroka ny tanako ny vavako,

²⁸dia heloka hanamelohan’ny mpitsara koa izany fa ho nihatsaravelatsihy tamin’Andriamanitra any ambony aho.

²⁹Raha toa ka nifaly noho ny loza nanjo izay nankahala ahy aho na nibitabitaka raha nozoim-pahoriana izy,

³⁰tsia, fa tsy navelako hanota akory ny vavako ka hangataka ozona hanjo azy;

³¹moa va tsy niteny ny tao an-daiko hoe: Iza moa no olona tsy novokisany hena?

³²Ny vahiny aza dia tsy nandry teny alatrano fa novohako ny varavarako ho an’ny mpandeha.

³³Raha toa ka nanarona ny fahadisoako tahaka an’i Adama aho ka nanafina ny heloko tato am-paosiko

³⁴satria nampihorohoro ny foko ny vahoaka marobe ary natahotra aho, fandrao hamavoin’ny mpiaramonina ka namitsaka, fa tsy sahy nivoaka ny varavarana.

³⁵Enga anie ka hisy hihaino ahy! Indro ny soniako! Enga anie ka hamaly ahy ny Tsitoha! Indro ny taratasy voasoratr’ilay manana ady amiko!

³⁶Hataoko eny an-tsoroko tokoa izany ary havonako amiko ho satroboninahitra.

³⁷Ny isan’ny diako dia hambarako Aminy ary tahaka ny fanatonan’ny zanak’andriana no hanatonako Azy.

³⁸Raha toa ka mitaraina hiampanga ahy ny taniko ka miara-mitomany ny vavaasako,

³⁹raha toa ka nihinana ny vokatra aho nefa tsy nandoa ny vidiny, na nanao izay hahafaty ny ain’ny tompony,

⁴⁰dia aoka ny tsilo no haniry hisolo ny varimbazaha ary ny ahi-dratsy hisolo ny orza! Tapitra ny tenin’i Joba.