Read La Bible en Malgache Joba 33 Bible Online

Joba 33 - La Bible en Malgache bible

Joba 33

¹Kanefa, miangavy anao aho, ry Joba, mihainoa izay alahatro ary atongilano ny sofinao amin’ny teniko rehetra!

²Indro, manoka-bava aho, miteny ato am-bavako ny lelako.

³Ny hitsim-poko no hiseho amin’ny teniko ary ny fahalalan’ny molotro no holazaina tsy hasiana fitaka.

⁴Ny Fanahin’Andriamanitra no efa nanao ahy ary ny fofonain’ny Tsitoha no mamelona ahy.

⁵Raha hainao, valio ary aho, miomàna ianao ka miatreha tsara.

⁶Indro, eo anatrehan’Andriamanitra aho dia mitovy aminao; eny, izaho koa dia mba nosombinana avy tamin’ny tanimanga.

⁷Indro, ny fampahatahorana avy amiko dia tsy hampahatahotra anao ary tsy hitambesatra aminao ny tanako.

⁸Efa nilaza teo anatrehako mihitsy ianao ary efa reko ihany ny feon’ny teninao hoe:

⁹Madio tsy manam-pahadisoana aho ary tsy manan-tsiny aman-keloka.

¹⁰E! Mahita izay hanatsiniana ahy foana Andriamanitra ary ataony fahavalony aho;

¹¹mampiditra ny tongotro ao amin’ny boloky hazo Izy ary mitsongo ny diako rehetra.

¹²E! Izany no tsy mahamarina anao, hoy aho; fa Andriamanitra dia lehibe loatra ka tsy leon’ny zanak’olombelona.

¹³Koa nahoana no manome tsiny Azy ianao noho ny tsy nampisehoany izay antony amin’ny ataony?

¹⁴Kanefa misy fomba iray itenenan’Andriamanitra; eny, fomba roa aza, nefa tsy tandrin’ny olona izany,

¹⁵dia ny nofy sy ny tsindrimandry amin’ny alina. Raha sondrian-tory iny ny olona ka renoka eo am-pandriana

¹⁶dia manokatra ny sofin’ny olona Izy ka manisy tombo-kase ny fananarany azy

¹⁷mba hampiala ny olona amin’ny fanaony sy hiaro azy amin’ny fireharehana.

¹⁸Miaro ny fanahiny tsy ho any an-davaka Izy ary ny ainy mba tsy ho voan’ny fiadiana atoraka.

¹⁹Anarina amin’ny fanaintainana eo am-pandrianany koa izy sy amin’ny fikotrankotran’ny taolany lalandava;

²⁰mankaloiloy azy ny hanina; eny, na ny hanim-py aza dia tsy tiany.

²¹Mihena ny nofony ka tsy hita ary mitranitrany ny taolany izay tsy hita teo;

²²dia manakaiky ny lavaka ny fanahiny ary manatona ny mpaka aina ny ainy.

²³Raha misy anjely ho mpanalalana ho azy, iray amin’ny arivo, hanoro izay tokony halehan’ny olona,

²⁴ary hamindra fo aminy ka niteny hoe: Vonjeo izy mba tsy hidina any an-davaka, fa efa nahita avotra aho,

²⁵dia ho tsara noho ny an’ny tanora ny nofony ary hody ho toy ny tamin’ny andron’ny fahatanorany izy;

²⁶hivavaka amin’Andriamanitra izy ka hankasitrahany ary hahita ny tavany amin’ny hafaliana, fa hampodiny amin’ny zanak’olombelona ny fahamarinany.

²⁷Dia hihira izy ka hilaza amin’ny olona hoe: Efa nanota aho fa nanao ny rariny ho heloka, kanefa tsy novaliana araka ny nataoko;

²⁸fa navotany ny fanahiko mba tsy hivarina any an-davaka ary mifaly ny aiko amin’ny fahitana ny mazava.

²⁹Indro, izany rehetra izany no ataon’Andriamanitra indroa amin’ny olona; eny, intelo aza,

³⁰mba hamerina ny fanahiny tsy ho any an-davaka mba hihazavany amin’ny fahazavan’ny velona.

³¹Tandremo, ry Joba, ka mihainoa ahy! Mangìna kely aloha ianao fa mbola hiteny aho!

³²Raha manan-kavaly ianao dia mamalia ahy ihany! Mitenena, fa ta hanamarina anao aho!

³³Fa raha tsy manan-kavaly ianao dia mihainoa ahy kosa! Mangìna tsara, fa hampianariko fahendrena ianao!