Read La Bible en Malgache Joba 34 Bible Online

Joba 34 - La Bible en Malgache bible

Joba 34

¹Ary mbola niteny ihany i Eliho hoe:

²Mandrenesa ny teniko, ianareo olon-kendry, ary mihainoa ahy, ianareo manam-pahalalana.

³Fa ny sofina no mamantatra teny ary ny vava no manandrana hanina.

⁴Koa aoka izay rariny no hodinihintsika ary aoka hiara-mamantatra izay tsara isika.

⁵Fa i Joba dia efa niteny hoe: Marina aho, saingy nesorin’Andriamanitra tamiko ny rariny;

⁶marina ny ahy nefa ampandaingainy aho; mahafaty ny zana-tsipìka mitsatoka amiko, na dia tsy manam-pahadisoana aza aho.

⁷Aiza no misy lehilahy tahaka an’i Joba izay misotro famingavingana toy ny rano

⁸ary tonga naman’ny mpanao ratsy sady miara-mandeha amin’ny ratsy fanahy?

⁹Fa hoy izy: Tsy mahasoa ny olona ny mihavana amin’Andriamanitra.

¹⁰Koa amin’izany, mihainoa ahy, ianareo manam-panahy! Lavitra an’Andriamanitra ny hanao ratsy! Ary lavitra ny Tsitoha ny hanao meloka!

¹¹Fa ny nataon’ny olona ihany no ampanodiaviny azy ka mamaly ny tsirairay araka ny lalany avy Izy.

¹²Eny tokoa, Andriamanitra tsy manao ratsy mihitsy ary ny Tsitoha tsy mba mamadika ny rariny.

¹³Iza moa no nanendry Azy ho Mpiandraikitra ny tany? Ary iza no nanorina izao tontolo izao?

¹⁴Raha toa ka ny tenany ihany no heveriny ka hangoniny ho any Aminy ny fanahiny sy ny fofonainy,

¹⁵dia hiala avokoa ny ain’ny nofo rehetra ary hiverina amin’ny vovoka ny olona.

¹⁶Raha manam-pahalalana ianao dia henoy izao ka atongilano amin’ny teniko ny sofinao!

¹⁷Moa mahay mitondra va izay tsy tia rariny? Ary Ilay marina sady mahery va no hohelohinao?

¹⁸Mety va ny miteny amin’ny mpanjaka hoe: Olom-poana ianao? Ary amin’ny zanak’andriana hoe: Ry ilay ratsy?

¹⁹Tsy mizaha ny tavan’ny lehibe Izy ary tsy manaja ny ambony mihoatra noho ny ambany satria samy asan’ny tanany avokoa izy rehetra.

²⁰Maty amin’ny indray mipy maso monja amin’ny mamatonalina ireny; mihetsiketsika ny vahoaka dia ringana izy ary ny mahery dia lasa tsy nesorin-tanan’olona.

²¹Fa ny mason’Andriamanitra dia mijery ny alehan’ny olona ary mahita ny diany rehetra Izy.

²²Tsy misy haizina na aloky ny fahafatesana izay ahazoan’ny mpanao ratsy miery.

²³Fa Andriamanitra tsy miandry ela vao mandinika ny olona izay tonga hotsaraina eo anatrehany.

²⁴Manorotoro ny olona mahery Izy na dia tsy manadina azy aza ka manangana olon-kafa hisolo azy.

²⁵Fa fantany ny asan’ireo ka manongana azy amin’ny alina Izy dia torotoro ireo.

²⁶Tehafiny tanana tahaka ny fanao amin’ny ratsy fanahy ireo eo imason’ny vahoaka.

²⁷Izany dia noho ny nialan’ireo tamin’Andriamanitra ka tsy nitandremany ny lalany akory.

²⁸Noho izany dia tonga eo anatrehany ny fitarainan’ny madinika ka reny ny fitarainan’ny ory.

²⁹Raha mangina Izy, iza no hahay hanameloka Azy? Raha manafin-tava Izy, iza no hahajery Azy? Nefa Izy dia mijery ny firenena na ny olona tsirairay

³⁰mba tsy hanjakan’ny ratsy fanahy ary tsy ho voafandrika ny vahoaka.

³¹Fa moa va mba efa nisy niteny tamin’Andriamanitra hoe: Efa nivesatra ny fijaliako aho ka tsy hanao ratsy intsony;

³²izay tsy hitako dia mba ampianaro ahy; raha nanao ratsy aho dia tsy hanao intsony?

³³Moa araka ny hevitrao va no hamalian’Andriamanitra ny ataon’ny olona no mandà ny toroheviny ianao? Ianao no mifidy fa tsy izaho! Koa izay fantatrao no ambarao!

³⁴Ny olona manam-panahy no hilaza amiko ary ny olon-kendry izay mihaino ahy dia hiteny amiko hoe:

³⁵Miteny tsy amim-pahalalana i Joba ary ny teniny dia tsy amim-pahendrena.

³⁶Enga anie ka hozahan-toetra mandrakariva i Joba noho ny famaliny araka ny fanaon’ny ratsy fanahy!

³⁷Fa ampiany fihaikana koa ny fahotany; miteha-tanana eto amintsika izy ka manao teny maro hoenti-miady amin’Andriamanitra.