Read La Bible en Malgache Joba 35 Bible Online

Joba 35 - La Bible en Malgache bible

Joba 35

¹Ary mbola niteny ihany i Eliho hoe:

²Ataonao va fa marina ny nitenenanao hoe: Marina noho Andriamanitra aho?

³Fa hoy ianao: Mampaninona anao moa izany? Inona no soa azoko amin’ny tsy hanotako?

⁴Izaho no hiteny hamaly ny teninao mbamin’ny an’ny namanao.

⁵Diniho ny lanitra ka jereo! Tsinjovy ny haavon’ny rahona: Tsy takatrao izany!

⁶Raha manota ianao, moa mahefa inona Aminy izany? Ary raha mihamaro ny fahotanao, mampaninona Azy moa izany?

⁷Raha marina ianao, hahazoany inona moa izany? Ary inona no horaisiny avy amin’ny tananao?

⁸Amin’ny olona tahaka anao ihany no mihatra ny ratsy ataonao ary amin’ny olombelona ihany no mihatra ny fahamarinanao.

⁹Noho ny haben’ny fampahoriana dia mitaraina ny olona; eny, minananana izy noho ny hetraketraka ataon’ny maro;

¹⁰nefa tsy misy miteny hoe: Aiza Andriamanitra, Mpanao ahy, izay mahatonga hira fiderana amin’ny alina,

¹¹izay manome fahalalana antsika mihoatra noho ny an’ny biby ambonin’ny tany, dia izay manome fahendrena antsika mihoatra noho ny an’ny voromanidina?

¹²Eny, mitaraina mafy ireo nefa tsy mamaly Izy noho ny fireharehan’ny ratsy fanahy.

¹³Ny fitarainana tsy amin’antony dia tsy mba henoin’Andriamanitra ary ny Tsitoha dia tsy mandinika izany.

¹⁴Na dia lazainao aza fa tsy mahita Azy ianao, efa tonga eo anatrehany ny ady, koa tsy maintsy miandry Azy ianao!

¹⁵Koa raha saingy tsy mihatra ny fahatezerany, moa tsy fantany tsara koa va ny fihaikana?

¹⁶Miloa-bava foana anefa i Joba ary manao teny maro tsy amim-pahalalana.