Read La Bible en Malgache Joba 36 Bible Online

Joba 36 - La Bible en Malgache bible

Joba 36

¹Mbola nandroso niteny ihany i Eliho hoe:

²Mahareta kely amiko dia hambarako aminao, fa mbola misy teny holazaina hanamarina an’Andriamanitra.

³Halaiko avy lavitra ny fahalalako ka hanamarina ny Mpanao ahy aho.

⁴Fa tsy lainga tsy akory ny teniko; lehilahy tanteraka amin’ny fahalalana no eto aminao!

⁵Indro, lehibe Andriamanitra, kanefa tsy mba mamingavinga; lehibe amin’ny herin’ny fahalalana Izy.

⁶Tsy mitsimbina ny ain’ny ratsy fanahy Izy fa manome rariny ho an’ny ory.

⁷Tsy mampiala ny masony amin’ny marina Izy. Ny amin’ny mpanjaka dia ambonin’ny sezafiandrianany no ampitoerany azy ho mandrakizay ka tafasandratra izy.

⁸Ary raha voafatotra amin’ny gadra izy ireny sy voafehy amin’ny tadin’ny fahoriana

⁹dia ambarany azy ny asany sy ny fahotany raha manandra-tena izy.

¹⁰Dia manokatra ny sofiny hihaino fananarana Izy ka mandidy azy ireny hibebaka hiala amin’ny ratsy.

¹¹Raha mihaino ka manaiky Azy izy dia lany amin’ny fiadanana ny androny ary ny taonany dia amin’ny fahafinaretana.

¹²Fa raha tsy mihaino kosa izy dia ho voatifitry ny lefona ka ho faty ao amin’ny tsy fahalalana.

¹³Fa ny mpihatsaravelatsihy dia mirakitra fahatezerana; tsy mitaraina izy na dia afatony aza;

¹⁴maty tanora izy; eny, afaka aina eo amin’ny mpijangajanga.

¹⁵Fa ny fahorian’ny ory kosa no entin’Andriamanitra mamonjy azy ary ny manjo azy no entiny manokatra ny sofiny.

¹⁶Ary ianao koa aza dia sarihiny hiala tao amin’ny fahaterena ho amin’ny malalaka tsy misy manembantsembana ary ny matavy indrindra no aroso ho eo ambonin’ny latabatrao.

¹⁷Raha mitsara ny adin’ny ratsy fanahy ianao dia aoka hazonina ny rariny sy ny hitsiny;

¹⁸aoka tsy hampirisika anao hiteny ratsy ny fahatezerana ary aoka tsy hampivily saina anao ny haben’ny kolikoly!

¹⁹Moa hahafaka anao amin’ny fahoriana va ny fitarainanao, na izay rehetra tratry ny hery sy tanjakao?

²⁰Aza irinao ny hiavian’ny alina izay ampialana ny olona amin’ny fitoerany.

²¹Tandremo, aza mivily ho amin’ny ratsy, fa saingy ozoim-pahoriana ianao dia mifidy izany.

²²Indro Andriamanitra dia misandratra amin’ny heriny; iza no mba mpampianatra tahaka Azy?

²³Iza no nandidy Azy tamin’izay lalan-kalehany? Ary iza no afaka hilaza Aminy hoe: Nanao ratsy Ianao?

²⁴Tsarovy ny hankalaza ny asany izay efa nataon’ny olona an-kira.

²⁵Mandinika izany ny olona rehetra ary mijery izany eny lavitra eny ny zanak’olombelona.

²⁶Indro, lehibe Andriamanitra ka tsy takatry ny saintsika Izy; tsy hita isa ny taonany.

²⁷Fa manintona ny rano Izy dia milatsaka ho ranonorana aman-javona izany

²⁸ary aidin’ny rahona izany ka alatsany amin’ny olona maro be.

²⁹Ary koa, iza moa no mahalala ny amin’ny fivelatry ny rahona sy ny fikotrokotroka ao an-dainy?

³⁰Indro, mamelatra ny fahazavany eo amboniny Izy ary manao ny fanambanin’ny ranomasina ho firakofany.

³¹Fa ireny zavatra ireny no itsarany ny firenena sady anomezany hanina betsaka.

³²Mifono fahazavana ny tanany ary baikoiny iny mba hahavoa ny fahavalony.

³³Ny fikotrokotrony dia manambara Azy ary ny omby aman’ondry koa aza dia milaza ny hiaviany.