Read La Bible en Malgache Joba 37 Bible Online

Joba 37 - La Bible en Malgache bible

Joba 37

¹Eny, izany no mampitepotepo ny foko ka mampiemponempona azy hiala amin’ny fitoerany.

²Henoy tsara ny fikotrokotroky ny feony sy ny rohona izay mivoaka avy amin’ny vavany!

³Mandefa izany ho eny ambanin’ny lanitra rehetra Izy ary ny tselatra hatrany amin’ny faran’ny tany.

⁴Aorianan’izany dia misy feo mirohondrohona; mampikotrokotroka ny feony mahatalanjona Izy, koa rehefa re ny feony dia tsy sakanany intsony ny tselatra.

⁵Mampikotrokotroka ny fahagagana ataony Andriamanitra; manao zava-dehibe tsy takatry ny saintsika Izy.

⁶Ny orampanala dia baikoiny hoe: Milatsaha eny ambonin’ny tany ianao! Ary toy izany koa ny ranonorana mivatravatra; eny, ny ranonorany mivatravatra mafy.

⁷Manakombona ny tanan’ny olona rehetra amin’ny tombo-kase Izy, mba hahafantatra ny asany ny olona rehetra izay nataony.

⁸Miditra ao amin’ny fiereny koa ny bibidia ka mamitsaka ao an-davany.

⁹Avy any atsimo ny tadio ary entin’ny rivotra avy any avaratra ny hatsiaka.

¹⁰Ny fofonain’Andriamanitra no mampisy ranomandry ka lasa mivaingana ny rano midadasika.

¹¹Ny rahona matevina dia tambesarany rano ary ny rahona manelatrelatra dia aeliny.

¹²Dia mihodinkodina amin’izay itarihany azy ireo mba hanatanteraka izay rehetra andidiany azy eny ambonin’ny tany, manerana izao tontolo izao,

¹³na alatsany ho famaizana izany na hanasoa ny taniny na ho famindrampo.

¹⁴Atongilano ny sofinao ka mihainoa, ry Joba! Mijanòna, koa mba diniho ny fahagagana ataon’Andriamanitra!

¹⁵Fantatrao va ny ibaikoany azy ireny ka ampamirapiratany ny tselatra eny amin’ny rahony?

¹⁶Fantatrao va ny fihevahevan’ny rahona matevina izay fahagagana ataon’Ilay tanteraka amin’ny fahalalana?

¹⁷Ianao izay mahatsiaro ny fitafianao ho mafana raha migaingaina ny andro azon’ny rivotra avy any atsimo,

¹⁸moa va ianao niara-nanefy Taminy ny habakabaka izay mitoetra mafy toy ny fitaratra natao tamin’ny metaly voarendrika?

¹⁹Mba ampianaro anay ary izay holazainay Aminy fa tsy hitanay izay halahatray noho ny haizina.

²⁰Holazaina Aminy va raha miteny aho? Moa tsy maintsy miteny va ny olona vao ho reny?

²¹Tsy hita ankehitriny ny mazava izay notakotakonan’ny rahona; nefa nisy rivotra nandalo dia nampisava azy ihany izany

²²ka misy mazava mitarehim-bolamena tamy avy any avaratra. Ao amin’Andriamanitra dia misy famirapiratana mahatahotra!

²³Ny Tsitoha, tsy mahita Azy isika. Lehibe amin’ny hery sy ny fitsarana ary ny fahamarinana tanteraka Izy. Tsy mba mampahory olona Izy.

²⁴Koa izany no hatahoran’ny olona Azy; tsy mijery izay manao azy ho hendry Izy.