Read La Bible en Malgache Joba 38 Bible Online

Joba 38 - La Bible en Malgache bible

Joba 38

¹Avy tao anatin’ny tafio-drivotra NY TOMPO no namaly an’i Joba hoe:

²Iza moa izato manao izay hahamaizina ny fisainana amin’ny teny tsy misy fahalalana?

³Misikìna ary tahaka ny lehilahy fa hanadina anao Aho ka valio.

⁴Taiza ianao fony Aho nanorina ny tany? Ambarao raha hainao.

⁵Iza ary no nandidy izay ho refiny raha fantatrao? Ary iza no nanenjana ny kofehy fandrefesana teo aminy?

⁶Teo ambonin’ny inona no nanorenana ny andriny ary iza no nandatsaka ny vato fehizorony,

⁷raha niara-nihira ny kintan’ny maraina ary nihoby avokoa ireo zanak’Andriamanitra?

⁸Iza no nanao varavarana misakana ny ranomasina raha nibosesika nivoaka avy tany am-bohoka izy,

⁹raha nanao ny rahona ho fitafiany Aho ary ny haizim-pito ho fonony,

¹⁰ary nandidy ny ho fetrany sady nanisy hidy sy varavarana

¹¹ka niteny hoe: Hatreto no azonao androsoana ka tsy hihoatra azy ary eto no hampijanonana ny fisafoaky ny onjanao?

¹²Hatrizay niainanao, moa mba efa nandidy ny maraina va ianao? Efa notoroanao ny fitoerany va ny fiposaky ny andro

¹³mba handraisany ny sisin’ny tany ka hakopakopany hiala ny ratsy fanahy?

¹⁴Dia miova tahaka ny tanimanga fanaovana fitombo-kase ny endriny ka miseho tahaka ny lamba misoratra.

¹⁵Hosakanana ny fahazavan’ny ratsy fanahy ka ho tapaka ny sandry naingaina.

¹⁶Moa efa niditra hatrany amin’ny loharanon’ny ranomasina va ianao ary efa nandehandeha tany amin’ny fanambanin’ny lalina?

¹⁷Moa efa naharihary taminao va ny vavahadin’ny fahafatesana? Ary efa hitanao va ny vavahadin’ny aloky ny fahafatesana?

¹⁸Moa efa voadinikao ny fivelatry ny tany? Ambarao ary raha fantatrao izany rehetra izany.

¹⁹Aiza ary no lalana ho any amin’ny fonenan’ny mazava? Ary aiza ny fitoeran’ny maizina

²⁰mba hitsenanao azy any amin’ny faran’ny alehany satria fantatrao ny lalana ho any an-tranony?

²¹Eny, fantatrao mantsy izany satria efa teraka ianao tamin’izay ary maro ny isan’ny andronao!

²²Moa efa niditra tany amin’ny trano fitahirizana ny orampanala va ianao? Ary efa hitanao va ny trano fitahirizana ny havandra

²³izay voatahiriko ho amin’ny andro fahoriana, dia ny andro misy ady sy tafika?

²⁴Aiza moa no lalana izarazaran’ny mazava sy ielezan’ny rivotra avy any atsinanana ho etỳ ambonin’ny tany?

²⁵Iza moa no nihady lalan-drano ho an’ny ranonorana mirotsaka be sy lalan-kaleha ho an’ny tselatra sy kotrokorana

²⁶mba hilatsahan’ny ranonorana ambonin’ny tany izay tsy itoeran’olona, dia any amin’ny tany efitra tsy misy mponina

²⁷ka hahavonto ny tany ngazana sy ny tany foana ary hampitsimoka ny ahitra sy hampaniry azy?

²⁸Manana ray va ny ranonorana? Ary iza kosa no miteraka ny ranonando?

²⁹Kibon’iza moa no niavian’ny ranomandry? Ary ny vongam-panala avy amin’ny lanitra, iza no niteraka azy?

³⁰Tonga mafy toy ny vato ny rano ary mitambatra ny fanambonin’ny lalina.

³¹Mahavona ny kofehin’ny Ikotokelimiadilaona va ianao na mahavaha ny fatoran’ny Telonohorefy?

³²Mahavoaka ireo vondron-kintana amin’ny fotoanany va ianao? Ary mahatondra an’i Bera mbamin’ny zanany va ianao?

³³Fantatrao va ny lalàna eny amin’ny lanitra? Ary mahafehy ny fanapahan’ireny etỳ an-tany va ianao?

³⁴Mahasandratra ny feonao ho amin’ny rahona matevina va ianao mba hanafotra anao ny rano mandriaka?

³⁵Mahay mandefa ny tselatra va ianao ka ho avy ireo hilaza aminao hoe: Indreto izahay?

³⁶Iza moa no nanao ny rahona matevina ho fitoeram-pahendrena ary irerỳ miseho erỳ an-danitra ho fampisehoana ny fahalalana?

³⁷Iza moa no manam-pahendrena mahisa ny rahom-potsy manify? Ary iza no mampitongilana ny fitoeran-dranon’ny lanitra

³⁸ka mitambatra ho dilatra ny vovoka ary mivongana ho bainga?

³⁹Mahay mihaza remby ho an’ny liom-bavy va ianao ary mahafaka ny hanoanan’ny liona tanora

⁴⁰raha mamitsaka ao amin’ny fitoerany izy ary manotrika ao amin’ny kirihitrala?

⁴¹Iza moa no manome hanina ny goaika raha mitaraina amin’Andriamanitra ny zanany ka mirenireny tsy mahita hanina?