Read La Bible en Malgache Joba 39 Bible Online

Joba 39 - La Bible en Malgache bible

Joba 39

¹Fantatrao va ny fotoana fiterahan’ny osidia any amin’ny harambato? Voahevitrao va ny fiterahan’ny dieravavy?

²Mahisa ny volana itondrany vohoka va ianao? Ary fantatrao va ny fotoana fiterahany?

³Miondrika izy ka teraka sady afaka ny farariany.

⁴Donga ny zanany, mihalehibe eny an-tampon-tanety eny; lasa mandeha izy ka tsy miverina eo aminy intsony.

⁵Iza moa no namela ny borikidia hikarenjy? Ary iza no efa namaha ny fatoran’ny borikidia

⁶izay nomeko ny tany ngazana ho fitoerany ary ny tanin-tsira ho fonenany?

⁷Ihomehezany ny tabataba ao an-tanàna; tsy ahoany akory ny antsoantson’ny mpandroaka boriky.

⁸Mikarenjy any an-tendrombohitra rehetra any izy mitady ny kijanany ary mitady ny zava-maitso rehetra izy.

⁹Mba mety manompo anao va ny ombimanga, na handry ao am-pahitrao amin’ny alina?

¹⁰Mahafatotra ny ombimanga amin’ny mahazaka ho ao am-bavaasanao va ianao? Na, mety manaraka anao handravona bainga any an-dohasaha va izy?

¹¹Azonao itokiana va izy satria lehibe ny heriny? Ary havelanao hataony va ny asanao?

¹²Azonao itokiana hitondra ny varinao mody va izy ary hanangona izany ho eo am-pamoloananao?

¹³Mikopakopaka noho ny hafaliana ny elatry ny aotirisy, nefa mahalemy fanahy azy va ny elany sy ny volony?

¹⁴Ilaozany anaty tany ny atodiny ka avelany hafanain’ny vovoka

¹⁵Tsy ahiny ny ho voaporitry ny tongotra ireo na ho voahitsaky ny bibidia.

¹⁶Mafy ny fitondrany ny zanany fa ataony hoatra ny tsy azy ireny; tsy ahoany akory na dia mila ho very foana aza izay nisasarany.

¹⁷Fa nesorin’Andriamanitra taminy ny fahendrena ary tsy nomeny anjara fahalalana izy.

¹⁸Raha mikopakopaka elatra toa hanidina izy dia ihomehezany ny soavaly sy ny mpitaingina azy.

¹⁹Moa manome hery ny soavaly va ianao na manarona vombo mihofahofa ny vozony?

²⁰Mahay mampitsipika azy tahaka ny valala va ianao? Mahatsiravina ny hamafin’ny fiefonefony!

²¹Mihehy ao amin’ny lohasaha izy ka mifalifaly noho ny heriny; mandroso hanetra ny ady izy.

²²Ihomehezany ny tahotra ary tsy mivadi-po izy sady tsy mianotra manoloana ny sabatra.

²³Mikitrakitrana eny amboniny ny tranon-jana-tsipìka sy ny lefona mitselatselatra ary ny lefom-pohy.

²⁴Miriotra mafy amin’ny fahavinirana sy ny fahatezerana izy ka tsy mety mijanona intsony rehefa maneno ny anjomara.

²⁵Na oviana na oviana no anenoan’ny anjomara dia mihiaka izy hoe Hia! Manimbolo ny ady izy raha mbola lavitra, dia ny antsoantson’ny manamboninahitra sy ny akoralava mihantsy ady.

²⁶Ny fahendrenao va no mampisidina ny hitsikitsika sy mampamelatra ny elany hianatsimo?

²⁷Noho ny didinao va no iakaran’ny voromahery sy anaovany ny akaniny eny an-dringiringy?

²⁸Eny amin’ny harambato no itoerany sy anaovany ny akaniny, dia any an-tendron’ny harambato izay mandany mafy.

²⁹Avy any no itiliany ny remby; mahatsinjo lavitra ny masony.

³⁰Mitsentsitra ra ny zanany ary izay itoeran’ny faty dia any izy.