Read La Bible en Malgache Joba 4 Bible Online

Joba 4 - La Bible en Malgache bible

Joba 4

¹Dia nandray fitenenana i Elifaza temanita hoe:

²Raha misy sahy miteny aminao dia ho sosotra va ianao? Fa raha ny mamehy vava kosa, iza moa no hahavita izany?

³Indro, efa nananatra ny maro ianao ary ny tanana miraviravy dia efa nampaherezinao;

⁴efa nanohana izay efa saika lavo ny teninao ary efa nampatanjahinao ny lohalika malemy.

⁵Nefa ankehitriny, mba manjo anao izany dia kivy ianao! Mihatra aminao izany ka raiki-tahotra ianao!

⁶Tsy ny fivavahanao va no tokinao? Ary tsy ny fahitsian’ny lalanao va no fanantenanao?

⁷Miangavy anao aho, tsarovy fa iza moa no very tsy nanan-tsiny? Ary taiza no nisy olo-mahitsy naringana?

⁸Araka izay efa hitako, dia izay miasa heloka sy mamafy fahoriana no mijinja izany;

⁹ny fofonain’Andriamanitra no andringanana azy; eny, ny fofonain’ny fahatezerany no mandevona azy.

¹⁰Ny fieron’ny liona; eny, ny feon’ny liona masiaka ary ny nifin’ny liona tanora dia tapaka;

¹¹maty ny liona noho ny tsy fahitany remby ary mihahaka ny zanaky ny liom-bavy.

¹²Nisy teny tonga tamiko mangingina ary ny sofiko dia nahare siosio avy taminy,

¹³tamin’ny eritreritra avy amin’ny tsindrimandry alina, raha sondrian-tory ny olona,

¹⁴dia azon-tahotra sy hovitra aho ka nampihorohoro ny taolako rehetra izany;

¹⁵nisy tso-drivotra nandalo teo amin’ny tavako ka nampitsangam-bolo ny tenako.

¹⁶Nijanona izy nefa tsy nahafantatra ny tarehiny aho; nisy endri-javatra teo anoloan’ny masoko; nisy fahanginana, dia nandre feo aho hoe:

¹⁷Ho marina noho Andriamanitra va ny zanak’olombelona? Ho madio noho ny Mpanao azy va ny olona?

¹⁸Indro, na ireo mpanompony aza dia tsy itokiany; eny, ireo irany aza dia ahitany fahadisoana,

¹⁹koa mainka izay mitoetra amin’ny trano tanimanga sady avy tamin’ny vovoka no niaviany ary mora poretina noho ny kalalao izy!

²⁰Indray andro monja dia montsana izy; tsy misy misaina azy na dia levona mandrakizay aza izy.

²¹Tsy voaongotra va ny kofehin-dainy ao aminy? Maty tao amin’ny tsy fananana fahendrena izy.