Read La Bible en Malgache Joba 40 Bible Online

Joba 40 - La Bible en Malgache bible

Joba 40

¹Ary NY TOMPO mbola niteny tamin’i Joba hoe:

²Hiady amin’ny Tsitoha va io mpanohitra Azy io? Aoka ny mpananatra an’Andriamanitra no hamaly!

³Ary namaly NY TOMPO i Joba hoe:

⁴Indro, tsinontsinona aho, koa inona no azoko avaly Anao? Hitampim-bava aho izao.

⁵Efa niteny indray mandeha aho ka tsy hamaly intsony; eny, indroa aza, fa tsy hanampy teny intsony aho.

⁶Dia niteny tamin’i Joba teo amin’ny tafio-drivotra NY TOMPO hoe:

⁷Misikìna tahaka ny lehilahy; fa hanadina anao Aho ka hampianatra Ahy ianao.

⁸Hanaisotra ny fahamarinana Amiko tokoa va ianao? Hanameloka Ahy va ianao mba hanamarinana ny tenanao kosa?

⁹Manan-tsandry tahaka ny an’Andriamanitra va ianao? Ary mahay mampikotrokotro-peo tahaka ny Azy va ianao?

¹⁰Miravaha fahamboniana sy rehareha ianao ary mitafia famirapiratana sy voninahitra!

¹¹Avelao hihanaka ny fahatezeranao mirehitra; jereo ny mpiavonavona rehetra ka ampietreo!

¹²Eny, jereo ny mpiavonavona rehetra ka aongany! Hoseo eo amin’ny fitoerany ihany ny ratsy fanahy.

¹³Asitriho ao amin’ny vovoka avokoa izy rehetra; sarony ao amin’ny maizina ny tavany!

¹⁴Fa Izaho kosa dia hidera anao satria mahavonjy anao ny tananao havanana.

¹⁵Indro ny behemota[3], izay nataoko tahaka ny nanaovako anao ihany! Mihinana ahitra tahaka ny omby izy.

¹⁶Indro, ao amin’ny andilany ny heriny ary ao amin’ny ozatra amin’ny kibony ny tanjany.

¹⁷Henjaniny ho tahaka ny hazo sedera ny rambony, mifaniditriditra ny ozatra amin’ny feny.

¹⁸Ny taolany dia tahaka ny fantsona varahina; eny, tahaka ny anjam-by ny taolany.

¹⁹Voalohany amin’ny asan’Andriamanitra izy; ny Mpanao azy no nanome sabatra azy.

²⁰Mamoaka hanina ho azy ny tendrombohitra izay ilalaovan’ny bibidia rehetra;

²¹eo ambanin’ny hazo lota no andriany, any am-pierena anaty zozoro sy honahona.

²²Manalokaloka azy ny hazo lota ary ny hazomalahelo eny amoron’ny ony no manodidina azy.

²³Indro, na dia maria aza ny ony, tsy manahy izy; matoky izy na dia migorodana amin’ny vavany aza ny Jordana.

²⁴Moa misy mahasambotra azy va raha mihiratra ny masony? Raha azon’ny fandrika izy, misy mahatsindrona ny orony va?

²⁵Mahasarika an’i leviatana* amin’ny fintana va ianao, na mahafatotra ny lelany amin’ny mahazaka?

²⁶Mahisy tady zozoro amin’ny orony va ianao, na mahaboroaka ny valanoranony amin’ny farango?

²⁷Hifona injato aman’arivo aminao va izy na hanao teny malefaka aminao?

²⁸Hanao fanekena aminao va izy? Azonao alaina ho andevonao mandrakizay va izy?

²⁹Hilalao azy tahaka ny filalao voronkely va ianao? Ary hamatotra azy ho an’ny zazavavy kely ao aminao va ianao?

³⁰Hataon’ny mpaka hazandrano varotra va izy ka hotsinjarainy amin’ny mpivaro-mandeha?

³¹Mahafeno lefom-pohy ny hodiny va ianao na firombaka amin’ny lohany?

³²Atehefo aminy ange ny tananao: Raha tsaroanao ny ady dia tsy hanindroa intsony ianao!