Read La Bible en Malgache Joba 41 Bible Online

Joba 41 - La Bible en Malgache bible

Joba 41

¹Indro, iza no sahisahy foana ka hikitika azy? Tsy mahakivy va na dia ny fijery azy aza?

²Tsy misy sahy manao vy very ny ainy hanaitra azy; koa iza kosa no mahajanona eo anatrehako?

³Iza no nanome Ahy aloha mba hamaliako azy? Ny eny ambanin’ny lanitra rehetra dia Ahy avokoa.

⁴Tsy mbola hangina Aho ny amin’ny rantsambatany sy ny heriny ary ny firafitry ny vatany.

⁵Iza no mahasonga ny fitafiany? Na iza no sahy hiditra ao amin’ny nifiny roa sosona?

⁶Iza no mahasokatra ny varavaran’ny tavany? Mahatsiravina ny manodidina ny nifiny!

⁷Reharehany ny faraoraon’ny kirany, mihidy avokoa toy ny voapetaka mafy amin’ny tombo-kase ireo;

⁸mikirindro ireo ka tsy azon’ny rivotra idirana eo anelanelany.

⁹Mifanindry lany ireo sady mifampiditra ka tsy azo sarahina.

¹⁰Ny fieviny dia mampamirapiratra fahazavana ary ny masony dia tahaka ny hodimason’ny maraina.

¹¹Lelafo no mivoaka avy amin’ny vavany; kilalaon’afo no mipariaka avy aminy.

¹²Ny vavorony dia ivoahan’ny setroka, tahaka ny avy amin’ny vilany mangotraka na amin’ny fahandroana.

¹³Ny fofonainy dia mampirehitra arina ary misy lelafo mivoaka avy amin’ny vavany.

¹⁴Ny vozony no itoeran’ny hery ary mibitaka eo anoloany ny fampahatahorana.

¹⁵Mivalombalona ny hotraka amin’ny tenany; mafy ireny ka tsy azo endahina.

¹⁶Mafy tahaka ny vato ny fony; eny, mafy tahaka ny vato fikosoham-bary.

¹⁷Raha mitsangana izy dia raiki-tahotra ny mahery; eny, toran-kovitra ireo ka mihemotra.

¹⁸Raha misy mamely azy amin’ny sabatra dia tsy mahalaitra, na amin’ny lefom-pohy na ny firombaka na ny zana-tsipìka.

¹⁹Ataony toy ny mololo ny vy ary toy ny hazo momoka ny varahina.

²⁰Tsy mampandositra azy ny zana-tsipìka; ataony ho toy ny vodivary ny vaton’antsamotady.

²¹Ataony ho toy ny vodivary koa ny langilangy; ihomehezany ny fisidin’ny lefona.

²²Ny takibany dia tahaka ny vakim-bilany maranitra; toy ny mitarika ragiragy eo amin’ny fotaka izy.

²³Mampandevy ny lalina ho tahaka ny ao am-bilany izy; manao ny ranomasina ho tahaka ny vilany misy menaka manitra izy.

²⁴Mampahazava ny lalany eo aorianany izy ka lasa toy ny volo fotsy ny lalina.

²⁵Tsy misy tahaka azy eny ambonin’ny tany, izay voaforona tsy hahalala tahotra.

²⁶Ny avo rehetra dia jereny avokoa; mpanjakan’ny bibidia rehetra izy.