Read La Bible en Malgache Joba 42 Bible Online

Joba 42 - La Bible en Malgache bible

Joba 42

¹Ary namaly NY TOMPO i Joba hoe:

²Fantatro fa hainao avokoa ny zavatra rehetra ary tsy azo ferana ny fisainanao.

³Iza no mahatakona ny fisainanao amin’ny tsy fahalalana? Koa nilaza izay tsy fantatro aho, dia zava-mahagaga loatra amiko, izay tsy takatry ny saiko.

⁴Mifona aminao aho, mihainoa, fa hiteny aho; hanontany Anao aho ka ampianaro.

⁵Fandrenesan’ny sofina ihany no nandrenesako Anao; fa ankehitriny izao kosa dia ny masoko no mahita Anao;

⁶koa miaiky sy mibebaka eto amin’ny vovoka sy ny lavenona aho.

⁷Rehefa voalazan’NY TOMPO tamin’i Joba izany teny izany dia hoy koa Izy tamin’i Elifaza temanita: Mirehitra aminao sy ny sakaizanao roa lahy ny fahatezerako satria tsy mba marina tahaka ny filazan’i Joba mpanompoko ny filazanareo Ahy.

⁸Koa ankehitriny, makà vantotra ombilahy fito sy ondrilahy fito ary mankanesa any amin’i Joba mpanompoko ka manolora fanatitra dorana manontolo ho anareo. Ary i Joba mpanompoko no hifona ho anareo fa izy no hankasitrahako, fandrao hamaly anareo araka ny fahadalanareo Aho, satria tsy marina tahaka ny filazan’i Joba mpanompoko ny filazanareo Ahy.

⁹Dia nandeha i Elifaza temanita sy i Bildada sohita ary i Zofara namatita ka nanatanteraka izay nandidian’NY TOMPO azy; ary NY TOMPO nankasitraka an’i Joba.

¹⁰Ary NY TOMPO nampody ny fiadanan’i Joba ho toy ny teo aloha rehefa nivavaka ho an’ny sakaizany izy, koa nanome azy indroa toraka izay nananany fahiny Izy.

¹¹Dia avy ny rahalahiny rehetra sy ny anabaviny rehetra ary ny olona rehetra izay fantany fahiny ka nankao aminy ary niara-nihinana taminy tao an-tranony ary nitsapa alahelo sady nampionona azy noho ny fahoriana rehetra izay nahatran’NY TOMPO taminy; ary samy nanome azy kesita* iray avy sy kavim-bolamena iray avy izy rehetra.

¹²Ary NY TOMPO nitahy ireo taona farany niainan’i Joba mihoatra noho ireo taona voalohany ka nanana ondry aman’osy efatra arivo sy iray alina, rameva enina arivo, omby roa arivo ary borikivavy arivo izy.

¹³Ary nanan-janakalahy fito sy vavy telo koa izy,

¹⁴koa ny anaran’ny zokiny dia nataony hoe Jemima, ny anaran’ny faharoa dia Kezia ary ny anaran’ny faravavy dia Kerena-Hapoka.

¹⁵Ary tsy nisy vehivavy tsara tarehy tahaka ny zanakavavin’i Joba hita tany amin’ny tany rehetra; niara-nomen’ny rainy lova tamin’ny anadahiny izy.

¹⁶Ary mbola velona efapolo amby zato taona i Joba taorianan’izany ka nahita ny zanany lahy sy ny zafiny ka hatramin’ny zafindohaliny aza.

¹⁷Dia maty i Joba rehefa tratra antitra sady ela niainana.