Read La Bible en Malgache Joba 6 Bible Online

Joba 6 - La Bible en Malgache bible

Joba 6

¹Dia namaly i Joba hoe:

²Enga anie ka holanjaina tokoa ny fahasosorako ka hampifandanjaina amin’ny mizana izy sy ny fahoriako!

³Fa ankehitriny dia mavesatra noho ny fasika any an-dranomasina ny fahoriako ka nirediredy aho.

⁴Fa ny zana-tsipìkan’ny Tsitoha no mitsatoka amiko ka mifoka ny poizina avy aminy ny fanahiko ary ny fampitahoran’Andriamanitra dia milahatra hamely ahy.

⁵Maneno va ny borikidia raha eo amin’ny vilona? Na mimamà va ny omby raha eo amin’ny vilona fihinany?

⁶Azo hanina va ny matsatso raha tsy asian-tsira? Mba misy tsirony va ny tapotsin’atody?

⁷Ny zavatra izay nolaviko tsy hotendrena, dia ireny no tsy maintsy haniko na dia maharikoriko ahy aza!

⁸Enga anie ka ho azoko izay angatahiko ary homen’Andriamanitra ahy anie izay iriko!

⁹Ho sitrak’Andriamanitra anie ny hanorotoro ahy; eny, halefany anie ny tanany ka hanapitra ny aiko!

¹⁰Dia hahita fiononana amin’izany aho ka hibitaka noho ny hafaliana na dia amin’ny fangirifiriana tsy mifaditra ovana aza satria tsy nandà ny tenin’ny Iray Masina aho.

¹¹Inona moa ny heriko no hanantena aho? Ary hanao ahoana moa ny hiafarako no hanindry fo aho?

¹²Herim-bato va ny heriko? Varahina va ny nofoko?

¹³Tsy efa foana va ny hery hoentiko mamonjy tena ary tsy efa nakifika hiala amiko va ny faharetana?

¹⁴Izay efa mivarahontsana dia tokony hiantran’ny sakaizany, fandrao hahafoy ny fahatahorana ny Tsitoha izy.

¹⁵Namadika ahy tahaka ny ranotrambo ny rahalahiko, tahaka ny masondrano any an-dohasahan-driaka izay malaky ritra,

¹⁶izay mivalomainty azon’ny ranomandry sady iafenan’ny orampanala,

¹⁷fa raha taninin’ny hainandro izy dia levona; raha maina ny andro dia ritra eo amin’ny fitoerany izy.

¹⁸Mivily lalana ny andian’ireo mpivarotra mandehandeha; miroso ho any an-tany foana izy ka very any.

¹⁹Mitazana azy ny andian’i Tema, manantena azy ny tarik’i Sheba;

²⁰diso fanantenana ireo; tonga teo izy kanjo nangaihay.

²¹Fa ankehitriny, ianareo koa dia tsinontsinona; mahita ny loza manjo ianareo ka raiki-tahotra!

²²Moa va efa niteny aho hoe: Omeo aho ka mahafoiza zavatra ho ahy avy amin’ny fanananareo?

²³Ary vonjeo amin’ny tanan’ny fahavalo aho ka afaho amin’ny tanan’ny mpampihorohoro?

²⁴Mampianara ahy dia hangina aho ary ampahafantaro ahy izay nahadiso ahy.

²⁵Endre, ny herin’ny teny marina! Fa mba mahavoa inona kosa moa ny anatra ataonareo?

²⁶Teny ihany va no heverinareo hokianina, dia tenin’ny olona mamoy fo izay entin’ny rivotra?

²⁷Eny, fa na dia ny kamboty aza dia anaovanareo filokana ary ny sakaizanareo dia amidinareo!

²⁸Fa ankehitriny, miangavy anareo, mba atreho kely aho! Dia ho hitanareo fa tsy mandainga aho tsy akory.

²⁹Miangavy anareo, diniho indray aho ary aoka tsy hisy fitsarana tsy marina; eny, diniho indray aho, fa mbola ao ihany ny fahamarinako!

³⁰Moa misy heloka va eo amin’ny lelako? Tsy mahay mamantatra izay ratsy va ny vavako?