Read La Bible en Malgache Joba 7 Bible Online

Joba 7 - La Bible en Malgache bible

Joba 7

¹Tsy mpiantafika va ny zanak’olombelona etỳ ambonin’ny tany? Ary tsy tahaka ny andron’ny mpikarama va ny androny?

²Toy ny mpanompo maniry alokaloka ary toy ny mpikarama miandry ny karaman’ny asany,

³dia toy izany no nanaovana ny volana mampahory ho lovako ary ny alina mahadisadisa ho anjarako.

⁴Raha vao mandry aho dia mieritreritra hoe: Rahoviana re aho no hifoha? Fa mihalava ny alina ary tsy mitsahatra mivadibadika aho mandra-pahazava ny andro.

⁵Ny nofoko dia mitafy olitra sy takompery toy ny baingan-tany; tonga vakivaky ny hoditro sady mitsiranorano.

⁶Faingana noho ny famahanan-tenona ny androko ka lany tsy misy fanantenana!

⁷Tsarovy fa tso-drivotra ny aiko! Tsy hahita soa intsony ny masoko.

⁸Tsy hahita ahy intsony ny mason’izay mijery ahy. Hizaha ahy ny masonao nefa tsy ho eo aho.

⁹Tahaka ny rahona misava ka levona, dia tahaka izany koa, izay midina any amin’ny fitoeran’ny maty*, dia tsy mba hiakatra intsony;

¹⁰tsy hiverina any an-tranony intsony izy ary tsy hahalala azy intsony ny fonenany.

¹¹Ary izaho dia tsy hamehy vava fa hiteny noho ny fahorian’ny fanahiko sy hitaraina noho ny fangidian’ny foko.

¹²Ranomasina va aho sa trozona no dia asianao fiambenana?

¹³Raha hoy aho: Hampionona ahy ny farafarako, hampitony ny fitarainako ny fandrianako,

¹⁴dia mampitahotra ahy amin’ny nofy Ianao ary mampihorohoro ahy amin’ny fahitana.

¹⁵Koa aleoko hokendaina; eny, aleoko ny fahafatesana aza toy izay izao taolako mitrakitraky izao!

¹⁶Maharikoriko ahy izao! Tsy ho ela velona aho! Avelao amin’izao aho fa fofona foana ny androko.

¹⁷Inona moa ny zanak’olombelona no isahirananao ka ikarakaranao azy fatratra?

¹⁸Sady vangianao isa-maraina izy no zahanao toetra isaky ny indray mipy maso?

¹⁹Oviana re no hihodina tsy hijery ahy Ianao ka hiala amiko mba hahazoako mitelin-drora?

²⁰Na dia ho nanota aza aho, nampaninona Anao moa izany, ry Mpandinika ny olombelona? Nahoana no dia nataonao fikendry aho ka tonga enta-mavesatra amiko ny tenako?

²¹Nahoana no tsy mamela ny fahadisoako sy manaisotra ny heloko Ianao? Fa izao dia efa handry any amin’ny vovoka aho; hitady ahy fatratra Ianao nefa tsy hisy intsony aho.