Read La Bible en Malgache Joba 8 Bible Online

Joba 8 - La Bible en Malgache bible

Joba 8

¹Dia nandray fitenenana i Bildada sohita hoe:

²Mandra-pahoviana no hiteny toy izany ianao ka hitsoka toy ny tafio-drivotra ny teny aloaky ny vavanao?

³Andriamanitra va hamadika ny fitsarana, na ny Tsitoha va hamadika ny rariny?

⁴Raha nanota Taminy ny zanakao dia nampanodiaviny azy ny fahadisoany.

⁵Fa raha ianao kosa no mandroso mitady an’Andriamanitra ka mifona amin’ny Tsitoha,

⁶ary raha madio sy mahitsy ianao, dia hifoha hamonjy anao tokoa Izy ary hampiadana indray ny fonenan’ny fahamarinanao,

⁷koa na dia kely aza no niandohanao dia ho lehibe indrindra no hiafaranao.

⁸Fa miangavy anao aho, anontanio ange ny Ntaolo, ka fantaro ny traikefa hitan’ny razany,

⁹fa vao omaly isika ka tsy mba mahalala ary aloka ihany ny androntsika etỳ ambonin’ny tany.

¹⁰Tsy ireny va no hampianatra anao ka hilaza aminao ary hamoaka teny avy ao am-pony?

¹¹Haniry va ny zozoro raha tsy eny amin’ny honahona? Hitrebona va ny harefo raha tsy misy rano?

¹²Mbola maitso izy sady tsy voajinja, kanefa malazo alohan’ny zava-maitso rehetra.

¹³Toy izany no lalan’izay rehetra manadino an’Andriamanitra ary ho levona ny fanantenan’ny mpihatsaravelatsihy;

¹⁴ho potika ny fanantenany satria tranon-kala no itokiany.

¹⁵Miankina amin’ny tranony izy, kanjo mikoa iny; mifikitra mafy aminy izy, kanjo tsy mahajoro iny.

¹⁶Mitsimoka tsara tandrifin’ny masoandro izy ary ny rantsany dia misandrahaka eo amin’ny tanimboliny;

¹⁷mifelipelika mifaniditra eo amin’ny korontam-bato ny fotony ary mahazo any anelanelany any.

¹⁸Nony fongorany hiala amin’ny fitoerany izy dia handa azy izany ka hilaza hoe: Tsy mbola nahita anao akory aho.

¹⁹Indro, izany ihany no fifalian’ny lalan-kalehany ary hisy hafa indray mitrebona avy amin’ny vovoka.

²⁰Indro Andriamanitra tsy hanary ny olona tsy manan-tsiny ary tsy hitantana ny mpanao ratsy;

²¹mbola hofenoiny hehy ny vavanao ary hoby ny molotrao.

²²Hitafy henatra izay mankahala anao ary tsy hisy intsony ny tranolain’ny ratsy fanahy.