Read La Bible en Malgache Joba 9 Bible Online

Joba 9 - La Bible en Malgache bible

Joba 9

¹Dia namaly i Joba hoe:

²Fantatro tokoa fa izany no izy; fa aiza no hahamarina ny zanak’olombelona eo anatrehan’Andriamanitra?

³Raha te hifandahatra Aminy izy dia tsy mahavaly teny Azy na dia iray amin’ny arivo aza.

⁴Lalim-pahendrena Izy sady feno hery sy tanjaka. Iza no nikiry nanohitra Azy ka tsy naninona?

⁵Mamindra tendrombohitra Izy nefa tsy mahalala izany akory ireny. Mamadika azy amin’ny fahatezerany Izy,

⁶mampihorohoro ny tany ho afaka amin’ny toerany Izy ka mihozongozona ny andriny.

⁷Manome teny ny masoandro Izy ka tsy miposaka iny; manisy tombo-kase manafina ny kintana Izy.

⁸Izy irery ihany no mamelatra ny lanitra sy mandia ny onjan-dranomasina;

⁹manao ireo kintana lehibe Izy, dia ny Bera sy ny Telonohorefy ary ny Ikotokelimiadilaona mbamin’ireo kintana maro any atsimo.

¹⁰Manao zava-dehibe tsy takatry ny saina Izy; eny, fahagagana tsy hita isa.

¹¹Indro, mandalo ahy Izy nefa tsy hitako ary mihelina Izy nefa tsy fantatro.

¹²Indro, mipaoka Izy, koa iza no mahasakana Azy? Iza no hilaza Aminy hoe: Inona no ataonao?

¹³Andriamanitra tsy mampitony ny fahatezerany; ny mpanampy an’i Rahaba[1] aza dia mitanondrika eo ambaniny.

¹⁴Mainka fa izaho dia tsy mahavaly Azy na mahafidy teny hifandaharako Aminy;

¹⁵fa na dia marina aza aho dia tsy hahavaly akory; hifona amin’Ilay manana ady amiko no hany heriko.

¹⁶Raha mba niantso aho ka namaly ahy aza Izy dia tsy ho nino aho fa nihaino ny feoko Izy.

¹⁷Fa manorotoro ahy amin’ny tafio-drivotra Izy ka manamaro ny ratrako tsy amin’antony

¹⁸sady tsy avelany haka aina akory aho fa vokisany zava-mangidy.

¹⁹Raha ny amin’ny hery, ny matanjaka, dia Izy izany! Ary raha ny amin’ny fitsarana, iza no hampiantso ahy?

²⁰Na dia marina aza aho dia hanameloka ahy ihany ny vavako ary na dia tsy manan-tsiny aza aho dia hanao ahy ho meloka ihany Izy.

²¹Marina aho nefa ataoko tsinontsinona ny aiko; tsy ahoako izay ho velona.

²²Mitovy ihany, koa izany no nilazako hoe: Ny marina sy ny meloka dia samy aringany avokoa.

²³Raha misy loza mahafaty tampoka dia ihomehezany ny fizahan-toetra manjo ny tsy manan-tsiny.

²⁴Ny tany dia efa voatolotra ho eo an-tanan’ny ratsy fanahy; manarona ny tavan’ny mpitsara Izy. Raha tsy Izy no manao izany dia iza indray ary?

²⁵Ny androko dia haingana noho ny iraka haingam-pandeha; lasa ireny ka tsy nahita soa akory.

²⁶Mihelina tahaka ny lakana zozoro izy, tahaka ny voromahery mipaoka ny rembiny.

²⁷Raha hoy aho hoe: Hanadino ny fitarainako aho, hitsahatra tsy hanjonitra aho ka ho miramiran-tava,

²⁸dia maharaiki-tahotra ahy ny fahoriako rehetra. Fantatro fa tsy hataonao ho afa-tsiny aho.

²⁹Tsy maintsy hatao ho meloka ihany aho! Koa nahoana aho no hanasa-tena foana?

³⁰Na dia mandro amin’ny orampanala aza aho ka manadio ny tanako amin’ny ranon-davenona

³¹dia hanitrika ahy any am-pahitra miaraka amin’izay Ianao ka hataon’ny fitafiako ho zava-betaveta aho.

³²Fa tsy olona tahaka ahy Izy ka ho azoko valina mba hifanatrehanay eo amin’ny fitsarana.

³³Tsy misy mpanelanelana anay ka hametraka ny tanany aminay roa tonta.

³⁴Aoka hanaisotra ny tsorakazony amiko Izy ary aoka tsy hampaharaiki-tahotra ahy intsony ny fampitahorana ataony!

³⁵Dia hiteny aho ka tsy hatahotra Azy satria ho fantatro fa tsy hatahotra foana aho!