Read La Bible en Malgache Salamo 10 Bible Online

Salamo 10 - La Bible en Malgache bible

Salamo 10

¹TOMPO ô, nahoana Ianao no mijanona eny lavitra eny? Nahoana Ianao no miery amin’ny andro fahoriana?

²Milomay manenjika ny mahantra ny ratsy fanahy; azon’ny fandrika nataony ihany izy ireny.

³Mirehareha ny ratsy fanahy fa nahazo izay niriny ary mahafoy sy mamingavinga NY TOMPO ny mpierina.

⁴Ny ratsy fanahy dia mirehareha hoe: Tsy hanadina Izy! Tsy misy Andriamanitra! Izany no tontalin-keviny.

⁵Mahomby amin’ny fotoana rehetra izy; any amin’ny avo ka lavitra azy ny fitsaranao; ny mpandrafy azy rehetra dia vingavingainy.

⁶Hoy izy anakampo: Tsy hangozohozo aho, tsy ho azon-doza mandrakizay doria aho!

⁷Feno ozona sy fitaka ary fanaovana an-keriny ny vavany; misy fampahoriana sy fampijaliana ao ambanin’ny lelany.

⁸Mamitsaka manao vela-pandrika ao an-tanàna izy; ao amin’ny takona no amonoany ny tsy manan-tsiny; mikendry ny mahantra ny masony.

⁹Manao vela-pandrika ao amin’ny takona tahaka ny liona ao amin’ny famitsahany izy, manao vela-pandrika hisambotra ny ampahorina izy, fandrihany amin’ny harato no fisambony ny ory.

¹⁰Torotoro sy mitanondrika ny mahantra fa lavon’ny herin’ny ratsy fanahy.

¹¹Dia hoy izy anakampo: Efa nanadino Andriamanitra! Nanafina ny tavany Izy ka tsy hahita mandrakizay!

¹²Mitsangàna, TOMPO ô! Atsangano ny tananao, Andriamanitra ô! Aza manadino ny ory!

¹³Nahoana no mamingavinga an’Andriamanitra ny ratsy fanahy? Nahoana no miteny anakampo izy hoe: Tsy hanadina akory Ianao?

¹⁴Hitanao ny fahoriana sy ny alahelo; jerenao izany mba hovalian’ny tananao; Ianao no fiononan’ny mahantra; Ianao no mpamonjy ny kamboty.

¹⁵Torotoroy ny sandrin’ny ratsy fanahy ary sazio noho ny helony ny mpanao ratsy mba tsy ho hitanao intsony.

¹⁶NY TOMPO no Mpanjaka mandrakizay doria; voafongotra tsy ho amin’ny taniny intsony ny Jentilisa.

¹⁷Efa nohenoinao, TOMPO ô, ny fanirian’ny mahantra; mampiorina ny fony Ianao sady mampihaino ny sofinao

¹⁸mba hanomezanao rariny ny kamboty sy ny voan’ny tsindry hazo lena, koa tsy hisy olombelona hampitahotra intsony etỳ an-tany.