Read La Bible en Malgache Salamo 102 Bible Online

Salamo 102 - La Bible en Malgache bible

Salamo 102

¹Vavaka ataon’ny ory raha reraka izy ka mandoatra ny alahelony eo anatrehan’NY TOMPO. TOMPO ô, henoy ny vavaka ataoko ary aoka hankeo Aminao ny fitarainako.

²Aza manafina ny tavanao amiko amin’ny andro fahoriako; atongilano amiko ny sofinao amin’ny andro itarainako; faingàna hamaly ahy.

³Fa levon-ko setroka ny androko ary mahamay tahaka ny forohana sisa tsy may ny taolako.

⁴Voakapa tahaka ny ahitra ny foko ka malazo, fa hadinoko na dia ny mihinan-kanina aza.

⁵Noho ny fisentoan’ny foko dia miraikitra amin’ny hoditro ny taolako.

⁶Tahaka ny sama any an-tany efitra aho ary tahaka ny vorondolo any an-tanàna haolo.

⁷Tsy mahita tory aho sady tahaka ny voronkely manirery eo amin’ny tafon-trano.

⁸Mandatsa ahy mandritra ny andro ny fahavaloko; izay misafoaka amiko dia manao ahy ho fiozonana.

⁹Fa lavenona no nohaniko tahaka ny mofo; ny zavatra nosotroiko dia noharoharoako ny ranomasoko,

¹⁰noho ny fahaviniranao sy ny fahatezeranao; fa naingainao aho kanefa natontanao indray.

¹¹Ny androko dia tahaka ny aloka efa mandroso ary efa malazo tahaka ny ahitra aho.

¹²Nefa Ianao, TOMPO ô, dia mipetraka manjaka mandrakizay; ny fahatsiarovana Anao dia mihatra amin’ny taranaka fara aman-dimby.

¹³Hitsangana Ianao ka hamindra fo amin’i Ziona* fa efa andro hamindrana fo aminy izao; eny, tonga izao ny fotoana.

¹⁴Fa sitraky ny mpanomponao ny vatony sady malahelo ny vovo-taniny izy.

¹⁵Hatahotra ny anaran’NY TOMPO ny Jentilisa* ary hatahotra ny voninahitrao ny mpanjaka rehetra amin’ny tany;

¹⁶fa nanangana an’i Ziona NY TOMPO; niseho tamin’ny voninahiny Izy;

¹⁷nijery ny vavaka nataon’ny mahantra Izy ka tsy nanevateva ny vavaka nataony.

¹⁸Hosoratana ho an’ny taranaka mandimby izany ary izay firenena mbola hoforonina no hidera NY TOMPO;

¹⁹fa mitazana avy any amin’ny fitoerany masina any amin’ny avo Izy; avy any an-danitra no nitsinjovan’NY TOMPO ny tany

²⁰mba hihaino ny fisentoan’ny mpifatotra sy hanafaka izay voatendry ho faty,

²¹mba hotorina any Ziona ny anaran’NY TOMPO ary any Jerosalema ny fiderana Azy

²²rehefa tafangona ny firenena sy ny fanjakana maro hanompo NY TOMPO.

²³Efa nahaketraka ny heriko tany an-dalana Izy; efa nahafohy ny androko Izy.

²⁴Hoy aho: Andriamanitro ô, aza maka ahy antenantenan’ny androko; ny taonanao dia mihatra amin’ny taranaka fara aman-dimby.

²⁵Tany aloha no nanorenanao ny tany ary asan’ny tananao ny lanitra.

²⁶Ireo dia ho levona fa Ianao no maharitra; ho rovitra toy ny fitafiana izy rehetra; toy ny lamba no hanovanao azy ka hosoloana izy.

²⁷Fa Ianao no tsy miova ary ny taonanao no tsy ho tapitra.

²⁸Handry fehizay ny zanaky ny mpanomponao ary hampitoerina eo anatrehanao ny taranany.