Read La Bible en Malgache Salamo 103 Bible Online

Salamo 103 - La Bible en Malgache bible

Salamo 103

¹Nataon’i Davida. Misaora NY TOMPO, ry fanahiko ary izay rehetra ato anatiko, misaora ny anarany masina.

²Misaora NY TOMPO, ry fanahiko ary aza misy hadinoinao ny fitahiany rehetra,

³izay mamela ny helokao rehetra, izay manasitrana ny aretinao rehetra,

⁴izay manavotra ny ainao tsy hidina any an-davaka, izay manarona famindrampo sy fiantrana anao,

⁵izay mamoky zava-tsoa anao; mihavao toy ny an’ny voromahery ny fahatanoranao.

⁶NY TOMPO manao fahamarinana sy fitsarana amin’izay rehetra ampahorina.

⁷Efa nampahafantatra an’i Mosesy ny lalan-kalehany Izy; nampahafantariny ny asa lehibe nataony ny Zanak’Israely.

⁸Mamindra fo sy miantra NY TOMPO, mahari-po sady be famindrampo.

⁹Tsy mifandahatra mandrakariva Izy, na mitahiry fahatezerana mandrakizay.

¹⁰Tsy mba manao amintsika araka ny fahotantsika Izy, na mamaly antsika araka ny helotsika.

¹¹Fa tahaka ny haavon’ny lanitra ambonin’ny tany no haben’ny famindrampony amin’izay matahotra Azy.

¹²Tahaka ny halavitry ny atsinanana amin’ny andrefana no halavitry ny anesorany ny fahotantsika amintsika.

¹³Tahaka ny fiantran’ny ray ny zanany no fiantran’NY TOMPO izay matahotra Azy.

¹⁴Fa Izy dia mahalala ny namolavolana antsika ka mahatsiaro fa vovoka isika.

¹⁵Tahaka ny ahitra ny andron’ny zanak’olombelona; tahaka ny vonin-javatra any an-tsaha ny famoniny,

¹⁶satria tsofin’ny rivotra izy ka lasa ary tsy mahalala azy intsony ny toerany.

¹⁷Fa ny famindrampon’NY TOMPO dia hatramin’ny taloha indrindra ka ho mandrakizay amin’izay matahotra Azy ary mihatra amin’ny taranaka ny fahamarinany,

¹⁸dia amin’izay mitandrina ny fanekeny sy mahatsiaro hankatò ny didiny.

¹⁹Efa nampitoetra ny sezafiandrianany any an-danitra NY TOMPO; ary manapaka izao rehetra izao ny fanjakany.

²⁰Misaora NY TOMPO, ianareo anjeliny, dia ianareo izay mahery indrindra sady mankatò ny didiny ary mihaino ny feon’ny teniny.

²¹Misaora NY TOMPO, ianareo miaramilany rehetra, dia ianareo mpanompony izay manao ny sitrapony.

²²Misaora NY TOMPO, ianareo asany rehetra manerana ny fanjakany. Misaora NY TOMPO, ry fanahiko.