Read La Bible en Malgache Salamo 104 Bible Online

Salamo 104 - La Bible en Malgache bible

Salamo 104

¹Misaora NY TOMPO, ry fanahiko. RY TOMPO Andriamanitro ô, lehibe indrindra Ianao; famirapiratana sy voninahitra no itafianao.

²Mitafy ny mazava tahaka ny mitafy lamba Izy ary mamelatra ny lanitra tahaka ny famelatra tranolay.

³Mametraka ny rairain-drihan’ny tranony amin’ny rano Izy sady manao ny rahona matevina ho kalesiny ka mandeha amin’ny elatry ny rivotra.

⁴Manao ny rivotra ho irany Izy ary ny lelafo ho mpanompony.

⁵Nanorina ny tany teo ambonin’ny fanorenany Izy mba tsy hihetsehany mandrakizay doria.

⁶Ny rano lalina no nasaronao azy tahaka ny lamba; nandifotra ny tendrombohitra ny rano.

⁷Noho ny teny mafy nataonao dia nandositra ny tendrombohitra, noho ny feon’ny kotrokoranao dia nirifatra izy.

⁸Nisondrotra ny tendrombohitra, nietry ny lohasaha, ho any amin’izay namboarinao hitoerany.

⁹Efa nasianao fetra tsy hihoarany izy mba tsy hiverina hanarona ny tany.

¹⁰Mampandeha loharano ho riaka eny amin’ny lohasaha Izy; eny anelanelan’ny tendrombohitra no alehan’ireny

¹¹ka isotroan’ny bibidia rehetra sy analan’ny borikidia ny hetahetany.

¹²Eo akaikiny no itoeran’ny voromanidina ary eo amin’ny rantsan-kazo no anenoany.

¹³Manondraka rano ny tendrombohitra avy any amin’ny tranony ambony Izy; ny vokatry ny asanao no mahavoky ny tany.

¹⁴Mampaniry ahitra ho an’ny biby fiompy sy anana ambolen’ny olona Izy ary mamoaka hanina avy amin’ny tany.

¹⁵Ny divay dia mampifaly ny olona ka mampamirapiratra ny tavany mihoatra noho ny diloilo ary ny mofo dia manohana ny ain’ny olona.

¹⁶Voky ny hazon’NY TOMPO, dia ny sederan’i Libanona izay namboleny.

¹⁷Eny no anaovan’ny voronkely ny akaniny ary ny vano dia eny amin’ny hazo kipreso no anaovany ny tranony.

¹⁸Ny tendrombohitra avo dia ho an’ny osidia; ny harambato dia fiarovana ho an’ny hiràka.

¹⁹Nanao ny volana ho famantarana ny fotoana Izy ary mahalala ny filentehany ny masoandro.

²⁰Mahatonga haizina Ianao dia tonga ny alina ka mivezivezy ny biby rehetra any an’ala;

²¹mierona maniry remby ny liona tanora ka mitady ny haniny avy amin’Andriamanitra.

²²Miposaka ny masoandro dia miverina ireny ary ao an-davany no amitsahany.

²³Fa ny olona kosa dia mivoaka ho any amin’ny raharahany sy ny asany mandra-paharivan’ny andro.

²⁴Endre ny hamaroan’ny asanao, TOMPO ô! Fahendrena no nanaovanao azy rehetra; henika ny zavatra nataonao ny tany.

²⁵Indro ny ranomasina, sady lehibe no malalaka, any no misy zava-mihetsiketsika tsy tambo isaina, dia zavamiaina, na ny kely na ny lehibe.

²⁶Any no alehan’ny sambo sy ny leviatana* izay noforoninao mba hilalao any.

²⁷Ireo rehetra ireo dia miandry Anao mba homenao ny haniny amin’ny fotoanany.

²⁸Manome Ianao dia manangona izy; manokatra ny tananao Ianao dia voky ny soa izy.

²⁹Manafina ny tavanao Ianao dia raiki-tahotra izy; alainao indray ny ainy dia maty izy ka mody any amin’ny vovoka nanalana azy.

³⁰Maniraka ny Fanahinao Ianao dia ary izy ary manavao ny velaran’ny tany Ianao.

³¹Ho mandrakizay anie ny voninahitry NY TOMPO; aoka hifaly amin’ny asany NY TOMPO.

³²Jereny ny tany dia mihorohoro; tendren’ny tanany ny tendrombohitra dia midona-tsetroka.

³³Hihira ho an’NY TOMPO aho raha mbola velona koa; hankalaza an’Andriamanitro aho raha mbola miaina.

³⁴Ho maminy anie ny fisainako Azy; izaho no hifaly amin’NY TOMPO.

³⁵Ho lany ringana tsy ho etỳ amin’ny tany ny mpanota ary tsy ho etỳ intsony ny ratsy fanahy. Misaora NY TOMPO, ry fanahiko. Haleloia*.