Read La Bible en Malgache Salamo 105 Bible Online

Salamo 105 - La Bible en Malgache bible

Salamo 105

¹Miderà NY TOMPO, miantsoa ny anarany; ampahafantaro any amin’ny firenena ny asany.

²Mihirà ho Azy, mankalazà Azy! Saintsaino ny fahagagana rehetra ataony.

³Ataovy ho reharehanareo ny anarany masina! Aoka hifaly ny fon’izay mitady NY TOMPO.

⁴Mitadiava NY TOMPO sy ny heriny; katsaho mandrakariva ny tavany.

⁵Tsarovy ny asa mahagaga nataony, dia ny fahagagana nataony sy ny fitsaran’ny vavany,

⁶ry taranak’i Abrahama mpanompony, dia ianareo olom-boafidiny, taranak’i Jakoba.

⁷NY TOMPO, Izy no Andriamanitsika; manerana ny tany rehetra ny fitsarany.

⁸Mahatsiaro mandrakariva ny fanekeny Izy, dia ilay teny izay voadidiny ho an’ny taranaka arivo mandimby;

⁹eny, ilay nataony tamin’i Abrahama sy ny fianianany tamin’Isaka;

¹⁰izay naoriny ho lalàna ho an’i Jakoba sy ho fanekena mandrakizay ho an’Israely

¹¹ka nilazany hoe: Homeko anao ny tany Kanana ho anjara lovanareo voazara tsara.

¹²Mbola olom-bitsy izy ireo tamin’izany; eny, vitsy sady vahiny tao;

¹³nifindrafindra firenena izy ireo ary nifindrafindra fanjakana tany amin’ny firenen-kafa.

¹⁴Tsy nisy navelany hampahory azy anefa, fa nananatra mpanjaka noho ny amin’ireo Izy hoe:

¹⁵Aza mikasika ireo Voahosotro ary aza manisy ratsy ireo mpaminaniko.

¹⁶Dia niantso ny mosary ho amin’ny tany Izy; nofoanany avokoa ny hanina rehetra izay tohan’aina;

¹⁷naniraka lehilahy iray hialoha azy Izy, dia i Josefa izay namidy ho andevo.

¹⁸Nampijalina tamin’ny fatorana ny tongony; nogadraina vy izy,

¹⁹mandra-pahatongan’ny fotoana nahatanterahan’ny teniny; nizaha toetra azy ny tenin’NY TOMPO.

²⁰Nandefa iraka hamaha azy ny mpanjaka, dia tamin’ny mpanapaka ny vahoaka izay nampandefa azy.

²¹Nametraka azy ho tompon’ny tranony izy ary ho mpanapaka ny fananany rehetra

²²mba hamatotra ny mpitondra araka ny sitrapony sy hampianatra fahendrena ny loholony.

²³Ary nankany Ejipta Israely; eny, nivahiny tany amin’ny tanin’i Hama i Jakoba.

²⁴Dia nahamaro ny taranaky ny olony ho be indrindra Izy ka nampahery azy noho ny fahavalony.

²⁵Nampiova ny fon’ireny hankahala ny olony sy hamitaka ny mpanompony Izy.

²⁶Naniraka an’i Mosesy mpanompony sy i Arona izay nofidiny Izy.

²⁷Ary izy ireo dia nanao ny famantarany teo aminy sy fahagagana tany amin’ny tanin’i Hama.

²⁸Nandefa ny haizina Izy dia tonga ny haizina; ary tsy nisy nanohitra ny teniny izy ireo.

²⁹Nahatonga ny rano teo aminy ho ra Izy ka nahafaty ny hazandranony.

³⁰Nisy sahona betsaka ny taniny; eny, na dia hatrao an’efitranon’ny mpanjakany aza.

³¹Niteny Izy dia tonga ny fihitra sy ny moka teny amin’ny faritaniny rehetra.

³²Nahatonga havandra ho solon’ny ranonorana Izy ary afo midedadeda teny amin’ny taniny.

³³Namely ny voalobony sy ny aviaviny Izy ka nanapatapaka ny hazo teo amin’ny taniny.

³⁴Niteny Izy dia tonga ny valala sy ny sompanga tsy hita isa;

³⁵dia nihinana ny zava-maitso rehetra teny amin’ny taniny ireny ka nandany ny vokatry ny taniny.

³⁶Namely ny lahimatoa rehetra tany amin’ny taniny Izy, dia ny voalohan-terany rehetra.

³⁷Dia nitondra ny olony nivoaka avy tany Izy, niaraka tamin’ny volafotsy sy volamena; tsy nisy nangozohozo na dia iray akory aza tamin’ireo fokony.

³⁸Faly i Ejipta tamin’ny nahalasanany, satria efa nahazo azy ny fahatahorana ireo.

³⁹Namelatra rahona ho fialokalofana Izy ary afo ho fanazavana nony alina.

⁴⁰Nangataka izy ireo dia nahatonga papelika Izy ary mofon-danitra no namokisany azy.

⁴¹Nanokatra ny vatolampy Izy dia nigororoana ny rano ka tonga renirano nandriaka tamin’ny tany maina.

⁴²Fa nahatsiaro ny teniny masina sy i Abrahama mpanompony Izy.

⁴³Nitondra ny olony nivoaka avy tany tamin’ny fifaliana Izy ary ny voafidiny tamin’ny fihobiana.

⁴⁴Nanome azy ny tanin’ny Jentilisa* Izy ary nandova ny nisahiranan’ny firenena maro ireny

⁴⁵mba hitandremany ny didiny sy hankatoavany ny lalànany. Haleloia*.