Read La Bible en Malgache Salamo 106 Bible Online

Salamo 106 - La Bible en Malgache bible

Salamo 106

¹Haleloia*. Miderà NY TOMPO fa tsara Izy; fa mandrakizay ny famindrampony.

²Iza no mahalaza ny asa lehibe ataon’NY TOMPO, na mahatonona ny fiderana Azy rehetra?

³Sambatra izay mitandrina ny rariny ka mitandro mandrakariva ny marina.

⁴TOMPO ô, tsarovy aho araka ny fankasitrahanao ny olonao; vangio amin’ny famonjenao aho,

⁵hahitako ny soa azon’ny voafidinao, hifaliako amin’ny fifalian’ny firenenao, hiravoravoako miaraka amin’ny lovanao.

⁶Efa nanota izahay mbamin’ny razanay, efa nanao izay meloka sy ratsy izahay.

⁷Tsy mba nandinika ny fahagagana nataonao ny razanay tany Ejipta; tsy mba nahatsiaro ny habetsahan’ny famindramponao ireny fa nikomy teo amoron-dranomasina, dia teo amoron’ny Ranomasina Mena.

⁸Kanefa namonjy azy ihany Izy noho ny anarany mba hampahafantarany ny asany lehibe.

⁹Dia noteneniny mafy ny Ranomasina Mena ka tonga maina ary nitondra azy nita ny rano lalina tahaka ny tany efitra Izy.

¹⁰Namonjy azy tamin’ny tanan’ny mpandrafy Izy ary nanavotra azy tamin’ny tanan’ny fahavalo.

¹¹Dia nosaronan’ny rano kosa ny rafiny ka tsy nisy niangana na dia iray akory aza.

¹²Dia nino ny teniny izy ka nihira ny fiderana Azy.

¹³Nalaky nanadino ny asany anefa izy ka tsy niandry ny saina hatolony,

¹⁴fa fatra-pitsiriritra tany an-tany efitra izy sady naka fanahy an’Andriamanitra tany an-tany foana.

¹⁵Dia nomeny azy izay nangatahiny kanefa nataony mahia izy.

¹⁶Dia nialona an’i Mosesy tany an-toby izy ireo sady nialona an’i Arona, olo-masin’NY TOMPO.

¹⁷Nisokatra ny tany dia nitelina an’i Datana ka nanarona ny antokon’i Abirama.

¹⁸Dia nisy afo nirehitra tamin’ny antokony; lelafo no nandoro ny ratsy fanahy.

¹⁹Nanao ombilahy kely tany Horeba izy ka niankohoka teo anoloan’ny sarin-javatra voarendrika.

²⁰Ary ny voninahiny dia natakalony sarin’omby homana ahitra.

²¹Nohadinoiny Andriamanitra, mpamonjy azy, izay efa nanao zava-dehibe tany Ejipta,

²²dia fahagagana tany amin’ny tanin’i Hama sy zava-mahatahotra teo amin’ny Ranomasina Mena.

²³Ary nilaza handringana azy Izy raha tsy i Mosesy voafidiny no nandroso hijoro tamin’ny banga teo anatrehany, hampiala ny fahatezerany mba tsy handringanany azy.

²⁴Nanamavo ny tany mahafinaritra ireo sady tsy mba nino ny teniny

²⁵fa nimonomonona tany an-dainy ka tsy nihaino ny feon’NY TOMPO.

²⁶Dia nananga-tanana taminy Izy fa hampiampatrampatra azy any an-tany efitra

²⁷ary ny taranany kosa dia any amin’ny Jentilisa*, ary hampihahakahaka azy any amin’ny tany maro Izy.

²⁸Nikambana tamin’i Baala-Peora ireo ka nihinana ny fanatitra ho an’ny maty.

²⁹Nampahatezitra NY TOMPO tamin’ny nataony ireo ka namely azy tampoka ny areti-mandringana.

³⁰Fa nitsangana nandroso i Finehasa ka nandamina dia nitsahatra ny areti-mandringana.

³¹Ary nisaina ho fahamarinany izany hatramin’ny taranaka fara aman-dimby mandrakizay.

³²Nampahatezitra NY TOMPO teo anilan’ny ranon’i Meriba ireo ka nisy nanjo an’i Mosesy noho ny nataon’ireo;

³³satria nikomy tamin’ny Fanahin’NY TOMPO ireo dia nanao teny tsy voahevitra i Mosesy.

³⁴Tsy naringan-dry zareo ny firenena izay nasain’NY TOMPO naringany;

³⁵fa nifangaro tamin’ny Jentilisa izy ka nianatra ny fanaony.

³⁶Nanompo ny sampiny izy ka tonga fandrika ho azy izany.

³⁷Namono ny zanany lahy sy ny zanany vavy ho fanatitra ho an’ny demonia* ireo;

³⁸eny, nandatsaka ny ran’ny tsy manan-tsiny izy, dia ny ran’ny zanany lahy sy ny zanany vavy izay novonoiny ho fanatitra ho an’ny sampin’i Kanana; koa nandoto ny tany tamin’ny ra izy.

³⁹Naloto tamin’ny asany izy ary nahatonga azy ho nijangajanga ny nataony.

⁴⁰Nirehitra tamin’ny olony ny fahatezeran’NY TOMPO ka nataony ho zava-betaveta ny lovany.

⁴¹Nanolotra azy teo an-tanan’ny Jentilisa Izy ka izay nankahala azy no nanapaka taminy.

⁴²Nampahory azy ny fahavalony ka naetry teo ambanin’ny tanany izy.

⁴³Matetika Izy no nanafaka azy; fa ireo kosa dia tsy nisaina afa-tsy ny hikomy Taminy ihany ka nihalevona noho ny helony.

⁴⁴Kanefa nijery ny fahoriany ihany Izy raha nandre ny fitarainany.

⁴⁵Nahatsiaro ny fanekeny Izy ka nanenina araka ny haben’ny famindrampony.

⁴⁶Nataony nahita famindrampo ireny tamin’izay rehetra namabo azy.

⁴⁷Vonjeo izahay, RY TOMPO Andriamanitray ô, ka angony avy amin’ny Jentilisa mba hisaoranay ny anaranao masina ka ho reharehanay ny fiderana Anao.

⁴⁸Isaorana anie NY TOMPO, Andriamanitry ny Israely, hatramin’ny taloha indrindra ka ho mandrakizay; ary aoka ny olona rehetra hiteny hoe: Amena! Haleloia*.