Read La Bible en Malgache Salamo 107 Bible Online

Salamo 107 - La Bible en Malgache bible

Salamo 107

¹Miderà NY TOMPO fa tsara Izy; fa mandrakizay ny famindrampony.

²Aoka hilaza izany ny navotan’NY TOMPO, dia izay navotany ho afaka tamin’ny tanan’ny fahavalo

³sy nangoniny avy tany amin’ny tany maro, dia avy tany atsinanana sy andrefana ary tany avaratra sy tany amin’ny ranomasina.

⁴Nirenireny tany an-tany efitra ireny ka nanavatsava tany an-tany foana ary tsy nahita tanàna honenana.

⁵Noana sy nangetaheta izy sady reraka ny ainy tao anatiny.

⁶Dia nitaraina tamin’NY TOMPO ireo raha ory ka nafahany tamin’izay mahatahotra azy;

⁷dia nitondra azy tamin’ny lalana mahitsy Izy mba hankanesany any amin’izay tanàna honenana.

⁸Aoka hidera NY TOMPO ireo noho ny famindrampony sy ny fahagagana ataony amin’ny zanak’olombelona!

⁹Fa mahafa-po ny fanahy mangetaheta Izy ary ny fanahy noana dia vokisany soa.

¹⁰Izay nipetraka tao amin’ny haizina sy ny aloky ny fahafatesana dia voafato-pahoriana sy vy

¹¹satria nandà ny tenin’Andriamanitra sady naniratsira ny anatry ny Avo Indrindra;

¹²dia nampietreny tamin’ny fahoriana ny fony; koa potraka izy nefa tsy nisy hamonjy.

¹³Dia nitaraina tamin’NY TOMPO ireo raha ory ka nafahany tamin’izay nampahatahotra azy.

¹⁴Nitondra azy nivoaka avy tao amin’ny haizina sy ny aloky ny fahafatesana Izy ary notapahany ny fatorany.

¹⁵Aoka hidera NY TOMPO ireo noho ny famindrampony sy ny fahagagana ataony amin’ny zanak’olombelona!

¹⁶Fa nanorotoro ny varavarana varahina Izy ary notapatapahiny ny hidy vy.

¹⁷Mitondra fahoriana ny adala noho ny fahadisoany sy ny helony.

¹⁸Nahamonamonaina azy ny hanina rehetra ary nanakaiky ny vavahadin’ny fahafatesana izy.

¹⁹Dia nitaraina tamin’NY TOMPO ireo raha ory ka nafahany tamin’izay nampahatahotra azy.

²⁰Nandefa ny teniny Izy mba hahasitrana azy ary nanafaka azy tao amin’ny lavaka nianjerany Izy.

²¹Aoka hidera NY TOMPO ireo noho ny famindrampony sy ny fahagagana ataony amin’ny zanak’olombelona!

²²Aoka hanolotra fanati-pisaorana izy ary hilaza ny asany amin’ny fihobiana.

²³Izay midina any an-dranomasina ka mandeha an-tsambo sy manao raharaha any amin’ny rano lehibe

²⁴no mahita ny asan’NY TOMPO sy ny fahagagana ataony amin’ny rano lalina.

²⁵Fa niteny Izy ka nanangana rivotra mahery izay nampisondrotra ny onjan-drano;

²⁶niakatra hatrany amin’ny lanitra ny olona ary nidina hatrany amin’ny lalina; torotoro noho ny fahoriana ny fanahiny.

²⁷Fanina ireo sady nivembena toy ny mamo ka very ny fahaizany rehetra.

²⁸Dia nitaraina tamin’NY TOMPO ireo raha ory ka nanafaka azy tamin’izay nampahatahotra azy Izy.

²⁹Nampahatony ny rivotra mahery Izy ka nitsahatra ny onjan-drano.

³⁰Dia faly ireo satria nitsahatra izany ary notarihiny ho amin’ny fitodiana niriny izy.

³¹Aoka hidera NY TOMPO ireo noho ny famindrampony sy ny fahagagana ataony amin’ny zanak’olombelona!

³²Ary aoka hanandratra Azy eo amin’ny fiangonan’ny olona izy ka hidera Azy eo amin’ny fipetrahan’ny loholona.

³³Mampody ny ony ho tany efitra Izy ary ny loharano ho tany mangentana,

³⁴ny tany mahavokatra ho tanin-tsira, noho ny faharatsian’ny mponina eo.

³⁵Mampody ny tany efitra ho farihy Izy ary ny tany maina ho loharano;

³⁶amponeniny ao izay noana mba hanamboatra tanàna honenana;

³⁷hamafy eny an-tsaha izy sady hamboly voaloboka ka hahazo vokatra be.

³⁸Dia mitahy azy Izy mba hitomboany betsaka ka tsy avelany hihavitsy ny biby fiompiny.

³⁹Fa mihakely sy mietry indray izy noho ny fampahoriana sy ny loza ary ny alahelo.

⁴⁰Mampidina fanamavoana amin’ny mpitondra NY TOMPO ka mampirenireny azy any an-tany efitra tsy misy lalana;

⁴¹fa manandratra ny mahantra ho afa-pahoriana kosa izy ka mampahamaro ny fianakaviany toy ny andian’ondry.

⁴²Hahita izany ny marina ka ho faly fa hikombom-bava kosa ny ratsy fanahy rehetra.

⁴³Izay hendry dia aoka hitandrina izany ka hahalala ny famindrampon’NY TOMPO.