Read La Bible en Malgache Salamo 109 Bible Online

Salamo 109 - La Bible en Malgache bible

Salamo 109

¹Ho an’ny mpiventy hira. Salamo nataon’i Davida. Ry Andriamanitra izay deraiko ô, aza mangina Ianao,

²fa nisoka-bava ny ratsy fanahy sy ny mpamitaka hamely ahy; niteny ahy tamin’ny lela mandainga izy.

³Teny feno fankahalana no nanodidinany ahy ary niady tamiko tsy amin’antony izy.

⁴Ny fitiavako dia valiny fandrafiana, fa izaho kosa dia mivavaka.

⁵Novaliany ratsy ny soa nataoko ary novaliany fankahalana ny fitiavako.

⁶Anendreo olona ratsy fanahy hifehy azy izy ary aoka hisy mpiampanga hitsangana eo ankavanany.

⁷Raha hotsaraina izy dia aoka ho meloka ary aoka ny fivavahany ho tonga fahotana.

⁸Aoka ho vitsy ny androny ary aoka ho lasan’olon-kafa ny anjara raharahany.

⁹Aoka ho kamboty ny zanany ary aoka ho mpitondratena ny vadiny.

¹⁰Aoka hirenireny mangataka ny zanany ary aoka hiremby lavitra ny tranony efa rava izy.

¹¹Aoka hamandrika izay rehetra ananany ny mpampindram-bola ary aoka hifaoka ny vokatry ny asany ny olon-kafa.

¹²Aoka tsy hisy haharitra hamindra fo aminy, na hiantra ny zanany kamboty.

¹³Aoka ho fongotra ny taranany ary aoka hovonoina amin’ny taranaka mandimby ny anarany.

¹⁴Aoka hotsarovan’NY TOMPO ny heloky ny rainy ary aoka tsy hovonoina ny heloky ny reniny.

¹⁵Aoka ho eo anatrehan’NY TOMPO mandrakariva izany ary hofoanany tsy ho eo ambonin’ny tany anie ny fahatsiarovana azy.

¹⁶Satria tsy mba nahatsiaro hamindra fo izy fa nanenjika ny ory sy ny mahantra ary ny reraka am-po mba hahafaty azy.

¹⁷Tia ozona izy ka nanody azy izany; tsy tia fitahiana izy ka nanalavitra azy izany.

¹⁸Nitafy ozona tahaka ny lambany izy ka niditra tao an-kibony tahaka ny rano izany ary tao amin’ny taolany tahaka ny diloilo;

¹⁹dia aoka ho tahaka ny lamba itafiany izany ary ho fehikibo hanaovany mandrakariva.

²⁰Izany no famaliana avy amin’NY TOMPO ho an’ny mpiampanga ahy, dia izay manendrikendrika ahy.

²¹Fa Ianao, RY TOMPO Andriamanitra ô, dia miasa ho ahy noho ny anaranao; afaho aho fa tsara ny famindramponao.

²²Fa ory sy mahantra aho ary ny foko dia voatsindrona ato anatiko.

²³Lasa tahaka ny aloka mihelina aho; roahina tahaka ny valala aho.

²⁴Malemy ny lohaliko noho ny fifadian-kanina ary efa lasa mahia kaozatra ny tenako.

²⁵Ary izaho dia tonga fandatsan’ireny; mijery ahy izy ka mihifikifi-doha.

²⁶Ampio aho RY TOMPO Andriamanitro; vonjeo araka ny famindramponao aho;

²⁷aoka ho fantany fa tananao izany; ary Ianao, TOMPO ô, no nanao izany.

²⁸Manozona izy ireo fa mitahy kosa Ianao; mitsanga-menatra izy fa mifaly kosa ny mpanomponao.

²⁹Mitafy henatra ny mpiampanga ahy ka misaron-kenatra tahaka ny lamba.

³⁰Hidera NY TOMPO amin’ny feo mafy aho; eny, eo amin’ny olona maro no hiderako Azy.

³¹Fa mitsangana eo ankavanan’ny mahantra Izy mba hamonjy azy amin’izay manameloka ny fanahiny.