Read La Bible en Malgache Salamo 115 Bible Online

Salamo 115 - La Bible en Malgache bible

Salamo 115

¹TOMPO ô, aza izahay, aza izahay no omena voninahitra fa ny anaranao ihany, noho ny famindramponao sy ny fahamarinanao.

²Nahoana ny Jentilisa* no miteny hoe: Aiza izay Andriamaniny?

³Nefa any an-danitra Andriamanitsika; efa nanao izay sitrapony rehetra Izy.

⁴Volafotsy sy volamena ny sampin’ireny, asa nataon’ny tanan’olombelona.

⁵Manam-bava izy nefa tsy miteny; mana-maso izy nefa tsy mahita;

⁶manan-tsofina izy nefa tsy mandre; manana orona izy nefa tsy manimbolo;

⁷manan-tanana izy nefa tsy mandray; manan-tongotra izy nefa tsy mandeha ary tsy mahaloa-peo ny tendany.

⁸Ho tahaka azy izay manao azy sy izay rehetra matoky azy.

⁹Ry Israely ô, matokia NY TOMPO; heriny sy ampingany Izy.

¹⁰Ry taranak’i Arona ô, matokia NY TOMPO; heriny sy ampingany Izy.

¹¹Ianareo izay matahotra NY TOMPO, matokia NY TOMPO; heriny sy ampingany Izy.

¹²Mahatsiaro antsika NY TOMPO ka mitahy; hitahy ny taranak’Israely Izy; hitahy ny taranak’i Arona Izy;

¹³hotahiny izay matahotra NY TOMPO, na ny kely na ny lehibe.

¹⁴Hahamaro anareo anie NY TOMPO, dia ianareo mbamin’ny zanakareo.

¹⁵Hitahy anareo anie NY TOMPO, Mpanao ny lanitra sy ny tany.

¹⁶Ny lanitra dia lanitry NY TOMPO; fa ny tany dia nomeny ho an’ny zanak’olombelona.

¹⁷Tsy mba hidera NY TOMPO ny maty, na izay rehetra midina any amin’ny mangingina;

¹⁸fa izahay kosa dia hisaotra NY TOMPO hatramin’izao ka ho mandrakizay. Haleloia*.