Read La Bible en Malgache Salamo 116 Bible Online

Salamo 116 - La Bible en Malgache bible

Salamo 116

¹Izaho dia tia NY TOMPO satria efa nandre ny feon’ny fifonako Izy;

²satria efa nanongilana ny sofiny tamiko Izy; dia hiantso aho raha mbola velona koa.

³Nihodidina tamiko ny famatoran’ny fahafatesana ary nahazo ahy ny fahorian’ny fitoeran’ny maty*; nahita fahoriana sy alahelo aho.

⁴Dia niantso ny anaran’NY TOMPO aho hoe: Mifona Aminao aho, TOMPO ô, afaho aho.

⁵Mamindra fo sy marina NY TOMPO; eny, miantra Andriamanitsika.

⁶Miaro ny olona tso-po NY TOMPO; reraka aho dia namonjy ahy Izy.

⁷Miverena ho amin’ny fitsaharanao, ry fanahiko, fa NY TOMPO efa nanisy soa anao.

⁸Ianao dia nanafaka ny fanahiko tamin’ny fahafatesana sy ny masoko tamin’ny ranomaso ary ny tongotro tamin’ny fahatafintohinana.

⁹Handeha eo anatrehan’NY TOMPO eo amin’ny tanin’ny velona aho.

¹⁰Nanam-pinoana tokoa aho na dia niteny aza hoe: Reraka loatra aho.

¹¹Hoy aho tamin’ny fahatairako: Mpandainga ny olona rehetra.

¹²Inona no havaliko NY TOMPO noho ny soa rehetra nataony tamiko?

¹³Handray ny kapoaky ny famonjena aho ka hiantso ny anaran’NY TOMPO.

¹⁴Hanefa ny voadiko amin’NY TOMPO aho; eny, eo anatrehan’ny olony rehetra.

¹⁵Sarobidy eo imason’NY TOMPO ny fahafatesan’ny olony masina.

¹⁶Indrisy, TOMPO ô! Mpanomponao tokoa aho; eny, mpanomponao sady zanaky ny mpanompovavinao. Namaha ny fatorako Ianao.

¹⁷Ianao no hanolorako fanati-pisaorana, ary ny anaran’NY TOMPO no hantsoiko.

¹⁸Hanefa ny voadiko amin’NY TOMPO aho eny, eo anatrehan’ny olony rehetra,

¹⁹dia eo an-kianjan’ny tranon’NY TOMPO, eo afovoanao, ry Jerosalema ô! Haleloia*.