Read La Bible en Malgache Salamo 118 Bible Online

Salamo 118 - La Bible en Malgache bible

Salamo 118

¹Miderà NY TOMPO fa tsara Izy; fa mandrakizay ny famindrampony.

²Aoka ny Israely hilaza hoe: Mandrakizay ny famindrampony.

³Aoka ny taranak’i Arona hilaza hoe: Mandrakizay ny famindrampony.

⁴Aoka izay matahotra NY TOMPO hilaza hoe: Mandrakizay ny famindrampony.

⁵Tao amin’ny fahoriana no niantsoako NY TOMPO, dia namaly ahy NY TOMPO ka nampahalalaka ahy.

⁶NY TOMPO no miandany amiko ka tsy hatahotra aho. Inona no azon’ny olona atao amiko?

⁷NY TOMPO no miandany amiko sady mamonjy ahy ary ho faly aho hahita ny amin’izay mankahala ahy.

⁸Tsara ny mialoka amin’NY TOMPO noho ny mialoka amin’ny olona.

⁹Tsara ny matoky NY TOMPO noho ny matoky ny mpanapaka.

¹⁰Nanodidina ahy ny firenena rehetra, fa ny anaran’NY TOMPO no nandringanako azy;

¹¹nanodidina ahy ireny; eny, nitangorona tamiko; ny anaran’NY TOMPO anefa no nandringanako azy.

¹²Nanodidina ahy tahaka ny renitantely izy; voavono tahaka ny afon-tsilo izy; fa ny anaran’NY TOMPO no nandringanako azy.

¹³Nanosika ahy mafy hahalavo ahy ianao nefa NY TOMPO no namonjy ahy.

¹⁴NY TOMPO no heriko ary Izy no deraiko, fa Izy no famonjena ahy.

¹⁵Ao an-dain’ny marina ny feo mihoby noho ny famonjena; ny tanana ankavanan’NY TOMPO dia mampiseho hery;

¹⁶ny tanana ankavanan’NY TOMPO dia misandratra; ny tanana ankavanan’NY TOMPO dia mampiseho hery.

¹⁷Tsy ho faty aho fa ho velona ka hitory ny asan’NY TOMPO.

¹⁸Nofaizin’NY TOMPO mafy aho nefa tsy natolony ho amin’ny fahafatesana.

¹⁹Vohay ny vavahadin’ny fahamarinana aho; hiditra eo aho ka hidera NY TOMPO.

²⁰Ity no vavahadin’NY TOMPO; ny marina no hiditra eo.

²¹Hidera Anao aho fa efa namaly ahy Ianao ka Ianao no famonjena ahy.

²²Ny vato izay nolavin’ny mpanao trano no tonga vato fehizoro.

²³Avy tamin’NY TOMPO izany ka zava-mahagaga eo imasontsika.

²⁴Ity no andro nataon’NY TOMPO; hifaly sy ho ravoravo amin’izany isika.

²⁵Mifona Aminao aho, TOMPO ô, vonjeo e! Mifona Aminao aho, TOMPO ô, ambino e!

²⁶Hotahina anie izay avy amin’ny anaran’NY TOMPO; avy ao amin’ny tranon’NY TOMPO no itsofanay rano anareo.

²⁷Andriamanitra NY TOMPO ka nampahazava antsika. Rohizo kofehy ny fanati-piravoravoana na dia hatreo amin’ny tandroky ny alitara aza.

²⁸Andriamanitro Ianao ka hidera Anao aho; eny, Andriamanitro, ka hanandratra Anao aho.

²⁹Miderà NY TOMPO fa tsara Izy; eny, mandrakizay ny famindrampony.