Read La Bible en Malgache Salamo 119 Bible Online

Salamo 119 - La Bible en Malgache bible

Salamo 119

¹Sambatra ny mahitsy lalana, dia izay mandeha araka ny lalànan’NY TOMPO.

²Sambatra izay mitandrina ny teny vavolombelony ka mitady Azy amin’ny fo manontolo;

³eny, izay tsy manao ny ratsy fa mandeha araka ny lalany.

⁴Namoaka ny didinao Ianao mba hotandremana tsara.

⁵Enga anie ka ho tafatoetra ny lalako hitandremako ny didinao!

⁶Dia tsy ho menatra aho rehefa mandinika ny didinao rehetra.

⁷Hidera Anao amin’ny fo mahitsy aho amin’ny ianarako ny fitsipikao marina.

⁸Ny didinao no hotandremako; aza dia mahafoy ahy Ianao!

⁹Inona no hiarovan’ny zatovo ny lalan-kalehany ho madio? Ny fitandremana araka ny teninao.

¹⁰Tamin’ny foko manontolo no nitadiavako Anao; aza avela hivily hiala amin’ny didinao aho.

¹¹Ato am-poko no iraketako ny teninao mba tsy hanotako Aminao.

¹²Isaorana anie Ianao, RY TOMPO; ampianaro ahy ny didinao.

¹³Ny molotro no nentiko nilaza ny fitsipika rehetra naloaky ny vavanao.

¹⁴Ny lalan’ny teny vavolombelonao no ifaliako, tahaka ny ifaliako amin’ny harena rehetra.

¹⁵Ny didinao no saintsainiko ary ny lalanao no dinihiko.

¹⁶Ny didinao no iravoravoako; tsy hadinoiko ny teninao.

¹⁷Asio soa aho mpanomponao mba ho velona ka hitandrina ny teninao.

¹⁸Ampahirato ny masoko mba hahitako zava-mahagaga ao amin’ny lalànanao.

¹⁹Vahiny etỳ an-tany aho; aza afeninao ahy ny didinao.

²⁰Torotoro ny fanahiko noho ny faniriany ny fitsipikao amin’ny fotoana rehetra.

²¹Voateninao mafy ny mpirehareha, dia ny olom-boaozona izay mania miala amin’ny didinao.

²²Esory amiko ny fahafaham-baraka sy ny fanamavoana; fa mitandrina ny teny vavolombelonao aho.

²³Na dia ireo mpanapaka aza dia mipetraka ka mioko hamely ahy; izaho mpanomponao dia misaintsaina ny didinao.

²⁴Ny teny vavolombelonao koa no firavoravoako eny, mpanolotsaina ahy izany.

²⁵Miraikitra amin’ny vovoka ny fanahiko; velomy aho araka ny teninao.

²⁶Nolazaiko Anao ny lalako dia namaly ahy Ianao; ampianaro ahy ny didinao.

²⁷Ampahalalao ahy ny lalan’ny didinao dia hisaintsaina ireo fahagagana nataonao aho.

²⁸Mipotrapotra-dranomaso aho noho ny alaheloko; ampaherezo aho araka ny teninao.

²⁹Esory amiko ny lalan’ny lainga ka ny lalànanao no anasoavy ahy.

³⁰Ny lalan’ny fahamarinanao no fidiko; apetrako eo anatrehako ny fitsipikao.

³¹Mifikitra amin’ny teny vavolombelonao aho; TOMPO ô, aza avela ho azon-kenatra aho.

³²Ny lalan’ny didinao no ihazakazahako, fa ampahalalahinao ny foko.

³³TOMPO ô, toroy ny lalan’ny didinao aho dia hotandremako hatramin’ny farany izany.

³⁴Omeo fahiratan-tsaina aho mba hitandrina ny lalànanao; eny, hitandrina azy amin’ny foko manontolo aho.

³⁵Ampandehano amin’ny lalan’ny didinao aho fa izany no sitrako.

³⁶Ataovy mirona ho amin’ny teny vavolombelonao ny foko, fa tsy ho amin’ny fitiavan-karena.

³⁷Avilio ny masoko tsy hijery zava-poana; velomy amin’ny lalanao aho.

³⁸Tovy ny teninao amin’ny mpanomponao, dia amin’izay matahotra Anao.

³⁹Esory ny fahafaham-baraka izay atahorako, fa tsara ny fitsipikao.

⁴⁰Indro, manina ny didinao aho; velomy amin’ny fahamarinanao aho.

⁴¹Aoka ho tonga amiko ny famindramponao, TOMPO ô, dia ny famonjenao, araka ny teninao.

⁴²Dia hamaly izay miteny ratsy ahy aho satria matoky ny teninao.

⁴³Ary aza dia esorina amin’ny vavako ny teny marina fa miandry ny fitsaranao aho.

⁴⁴Dia hitandrina ny lalànanao mandrakariva aho, dia mandrakizay doria.

⁴⁵Ary handeha amin’ny malalaka aho fa ny didinao no tadiaviko.

⁴⁶Hilaza ny teny vavolombelonao eo anatrehan’ireo mpanjaka aho ka tsy ho menatra.

⁴⁷Ary hiravoravo amin’ny didinao aho satria tiako ireny.

⁴⁸Hasandratro ny tanako ho amin’ny didinao satria tiako ireny; hosaintsainiko ny didinao.

⁴⁹Tsarovy ny teny natao tamiko mpanomponao, dia ilay teny nampanantenainao ahy.

⁵⁰Izany no mampionona ahy amin’ny fahoriako; ny teninao no mamelona ahy.

⁵¹Maniratsira ahy fatratra ny mpirehareha; tsy mba mivily miala amin’ny lalànanao aho.

⁵²Mahatsiaro ny fitsipikao izay hatramin’ny taloha aho, TOMPO ô, dia mionona.

⁵³Fahatezerana mirehitra no nahazo ahy noho ny amin’ny ratsy fanahy izay mahafoy ny lalànanao.

⁵⁴Ny didinao no ataoko an-kira ao amin’ny trano fivahinianako.

⁵⁵Mahatsiaro ny anaranao aho nony alina, TOMPO ô, ka mitandrina ny lalànanao.

⁵⁶Izao no anjarako, dia ny mitandrina ny didinao.

⁵⁷Anjarako NY TOMPO; minia mitandrina ny teninao aho.

⁵⁸Mifona Aminao amin’ny foko manontolo aho; mamindrà fo amiko araka ny teninao.

⁵⁹Mihevitra ny lalako aho ka mamerina ny tongotro ho amin’ny teny vavolombelonao.

⁶⁰Mandeha haingana aho ka tsy mitaredretra amin’ny fitandremana ny didinao.

⁶¹Nihodidina tamiko ny famatoran’ny ratsy fanahy; tsy mba nanadino ny lalànanao aho.

⁶²Mamatonalina no hifohazako hidera Anao noho ny fitsaranao marina.

⁶³Naman’izay rehetra matahotra Anao aho sady naman’izay mitandrina ny didinao.

⁶⁴TOMPO ô, henika ny famindramponao ny tany; ampianaro ahy ny didinao.

⁶⁵TOMPO ô, efa nasianao soa ny mpanomponao, araka ny teninao.

⁶⁶Ampianaro fahaiza-mamantatra tsara sy fahalalana aho fa matoky ny didinao aho.

⁶⁷Fony tsy mbola azom-pahoriana aho dia naniasia; fa ankehitriny dia mitandrina ny teninao aho.

⁶⁸Sady tsara Ianao no mpanao ny tsara; ampianaro ahy ny didinao.

⁶⁹Namoron-dainga hamelezana ahy ny mpirehareha; amin’ny foko manontolo no itandremako ny didinao.

⁷⁰Mandry tahaka ny menaka ny fony; fa izaho kosa dia ny lalànanao no iravoravoako.

⁷¹Soa ihany aho nampahorina mba hianarako ny didinao.

⁷²Ny lalànan’ny vavanao no mahatsara ahy mihoatra noho ny volamena sy ny volafotsy an’arivony.

⁷³Ny tananao no nanao ahy sy nanamboatra ahy; omeo saina mahiratra aho mba hianarako ny didinao.

⁷⁴Hahita ahy izay matahotra Anao ka ho faly, fa ny teninao no andrasako.

⁷⁵Fantatro, TOMPO ô, fa marina ny fitsaranao ary ny fahamarinanao no nampahorianao ahy.

⁷⁶Ny famindramponao anie no hampiononana ahy araka ny teninao tamin’ny mpanomponao.

⁷⁷Aoka ho tonga amiko ny fiantranao mba ho velona aho, fa ny lalànanao no firavoravoako.

⁷⁸Aoka ho menatra ny mpirehareha fa nampahory ahy tsy amin’antony izy; fa izaho dia misaintsaina ny didinao.

⁷⁹Aoka hiverina amiko izay matahotra Anao sy izay mahalala ny teny vavolombelonao.

⁸⁰Aoka ho marina tsara ny foko amin’ny fitanana ny didinao mba tsy hahamenatra ahy.

⁸¹Reraka ny aiko satria manina ny famonjenao aho; ny teninao no andrasako.

⁸²Pahina ny masoko miandry ny teninao ka hoy aho hoe: Rahoviana no hampionona ahy Ianao?

⁸³Fa tahaka ny siny hoditra ao amin’ny setroka aho, nefa tsy mba hadinoiko ny didinao.

⁸⁴Hafiriana ny andron’ny mpanomponao? Rahoviana Ianao no hanao fitsarana amin’izay manenjika ahy?

⁸⁵Efa nihady lavaka hianjerako ny mpirehareha, dia izay tsy manaraka ny lalànanao.

⁸⁶Marina ny didinao rehetra; manenjika ahy tsy amin’antony ireny; vonjeo aho.

⁸⁷Saika nofongorany tamin’ny tany aho kanefa tsy mba mahafoy ny didinao aho.

⁸⁸Velomy aho araka ny famindramponao, dia hitandrina ny teny vavolombelona naloaky ny vavanao aho.

⁸⁹Ho mandrakizay, TOMPO ô, no nanorenanao any an-danitra ny teninao.

⁹⁰Hihatra amin’ny taranaka fara aman-dimby ny fahamarinanao; efa nampitoetra ny tany Ianao ka indro, mitoetra izy.

⁹¹Mitoetra ny zavatra rehetra ankehitriny, araka ny didinao, satria manompo Anao ny zavatra rehetra.

⁹²Raha tsy ny lalanao no niravoravoako dia maty tamin’ny fahoriako aho.

⁹³Tsy hohadinoiko mandrakizay ny didinao, fa ireny no amelomanao ahy.

⁹⁴Anao aho, vonjeo aho, fa ny didinao no tadiaviko.

⁹⁵Miandry ahy ny ratsy fanahy mba hahafaty ahy; mandinika ny teny vavolombelonao aho.

⁹⁶Efa hitako fa manam-petra avokoa ny tanteraka rehetra ary tsy hita noanoa ny didinao.

⁹⁷Endre ny fitiavako ny lalànanao! Fisaintsainako mandrakariva izany.

⁹⁸Mampahahendry ahy mihoatra noho ny fahavaloko ny didinao satria ato amiko mandrakizay ireny.

⁹⁹Hendry noho ny mpampianatra ahy rehetra aho, satria ny teny vavolombelonao no fisaintsainako.

¹⁰⁰Hendry noho ny zokiolona aho satria ny didinao no tandremako.

¹⁰¹Arovako ny tongotro tsy ho amin’izay lalan-dratsy mba hitandremako ny teninao.

¹⁰²Tsy mba miala amin’ny fitsipikao aho fa Ianao no mampianatra ahy.

¹⁰³Endre ny hamamin’ny teninao raha andramako, mihoatra noho ny tantely ato am-bavako aza!

¹⁰⁴Ny didinao no nahazoako fahalalana; izany no ankahalako ny lalam-pitaka rehetra.

¹⁰⁵Fanilon’ny tongotro sy fanazavana ny lalako ny teninao.

¹⁰⁶Efa nianiana aho ka efaiko izany, fa hitandrina ny fitsipikao marina aho.

¹⁰⁷Ampahoriana loatra aho; TOMPO ô, velomy araka ny teninao aho.

¹⁰⁸TOMPO ô, aoka anie mba hankasitrahanao ny fanatitra an-tsitrapo aloaky ny vavako ary ampianaro ahy ny fitsipikao.

¹⁰⁹Mandrakariva, an-tenda ihany ny aiko, kanefa tsy manadino ny lalànanao aho.

¹¹⁰Manao vela-pandrika haningotra ahy ny ratsy fanahy, kanefa tsy mania miala amin’ny didinao aho.

¹¹¹Efa noraisiko ho lovako mandrakizay ny teny vavolombelonao satria fifalian’ny foko izany.

¹¹²Apetrako ny foko hankatò ny didinao, mandrakizay, hatramin’ny farany.

¹¹³Halako ny mpiroa saina fa ny lalànanao no tiako.

¹¹⁴Fiereko sy ampingako Ianao; ny teninao no andrasako.

¹¹⁵Mialà amiko ianareo mpanao ratsy mba hitandremako ny didin’Andriamanitro.

¹¹⁶Tohàny araka ny teninao aho mba ho velona ary aoka tsy ho menatra amin’ny fanantenako aho.

¹¹⁷Tohàny aho mba ho voavonjy ka ho faly mandrakariva hijery ny didinao.

¹¹⁸Ataonao tsinontsinona izay rehetra mania amin’ny didinao eny, lainga ny fitaka ataony.

¹¹⁹Efa nataonao fanary tain-drendrika ny ratsy fanahy rehetra amin’ny tany; izany no itiavako ny teny vavolombelonao.

¹²⁰Mipararetra ny nofoko noho ny fahatahorana Anao ary matahotra ny fitsaranao aho.

¹²¹Manaraka ny fitsipika sy ny fahamarinana aho; aza manolotra ahy ho amin’ny mpampahory ahy.

¹²²Iantohy ny mpanomponao mba ho soa; aza avela hampahory ahy ny mpirehareha.

¹²³Pahina ny masoko miandry ny famonjenao sy ny tenin’ny fahamarinanao.

¹²⁴Ataovy amin’ny mpanomponao araka ny famindramponao ary ampianaro ahy ny didinao.

¹²⁵Mpanomponao aho ka ampahirato ny saiko mba ho fantatro ny teny vavolombelonao.

¹²⁶Efa andro tokony hampisehoan’NY TOMPO ny asany izao; fa mandika ny lalànanao ny olona.

¹²⁷Izany no itiavako ny didinao mihoatra noho ny volamena; eny, noho ny volamena tsy miharo aza.

¹²⁸Izany no iheverako ny didy rehetra ho marina avokoa; halako ny lalam-pitaka rehetra.

¹²⁹Mahagaga ny teny vavolombelonao ka izany no itandremako azy.

¹³⁰Mitondra fahazavana ny famoahana ny hevitry ny teninao ka manome fahalalana ho an’ny olona tso-po.

¹³¹Mitanatana vava aho ka misento, fa ny didinao no iriko.

¹³²Todiho aho ka mamindrà fo amiko, araka ny tokony ho anjaran’izay tia ny anaranao.

¹³³Ampioreno amin’ny teninao ny diako ary aza avela hanapaka ahy izay mety ho faharatsiana.

¹³⁴Vonjeo amin’ny fampahoriana ataon’ny olona aho dia hitandrina ny didinao.

¹³⁵Ampamirapirato amin’ny mpanomponao ny tavanao ary ampianaro ahy ny didinao.

¹³⁶Rano mandriaka no mijononoka amin’ny masoko noho ny tsy fitandreman’ny olona ny lalànanao.

¹³⁷Marina Ianao, TOMPO ô, ary mahitsy ny fitsaranao.

¹³⁸Efa voadidinao amin’ny fahamarinana sy ny fahatokiana feno ny teny vavolombelonao.

¹³⁹Mandevona ahy ny zotom-poko satria nanadino ny teninao ny mpandrafy ahy.

¹⁴⁰Voazaha toetra tamin’ny memy ny teninao ka tian’ny mpanomponao.

¹⁴¹Kely aho ka natao tsinontsinona, nefa tsy hadinoiko ny didinao.

¹⁴²Ny fahamarinanao dia fahamarinana mandrakizay ary marina ny lalànanao.

¹⁴³Fahoriana sy fahaterena no nahazo ahy, fa ny didinao no firavoravoako.

¹⁴⁴Ny fahamarinan’ny teny vavolombelonao dia mandrakizay; omeo fahiratan-tsaina aho mba ho velona.

¹⁴⁵Ny foko manontolo no nentiko nitaraina hoe: Valio aho, TOMPO ô; ny didinao no hotandremako;

¹⁴⁶Nitaraina taminao aho hoe: Vonjeo aho, dia hitandrina ny didinao.

¹⁴⁷Raha mbola tsy nazava ratsy aza ny andro dia nitaraina aho; ny teninao no andrasako.

¹⁴⁸Nialoha ny fotoam-piambenana amin’ny alina ny masoko mba hisaintsainako ny teninao.

¹⁴⁹Henoy araka ny famindramponao ny feoko; TOMPO ô, velomy aho araka ny fitsipikao.

¹⁵⁰Efa manakaiky ireo izay fatra-panaraka ny ratsy, dia izay manalavitra ny lalànanao.

¹⁵¹Akaiky Ianao, TOMPO ô, ary marina ny didinao rehetra.

¹⁵²Efa fantatro ela tamin’ny teny vavolombelonao fa nampitoerinao ho mandrakizay ireny.

¹⁵³Jereo ny fahoriako ka vonjeo aho, fa tsy mba hadinoiko ny lalànanao.

¹⁵⁴Soloy vava aho ka vonjeo; velomy araka ny teninao aho.

¹⁵⁵Lavitra ny ratsy fanahy ny famonjena, satria tsy tadiaviny ny didinao.

¹⁵⁶Lehibe ny antranao, TOMPO ô; velomy aho araka ny fitsipikao.

¹⁵⁷Maro ny mpanenjika sy mpandrafy ahy; tsy mba niala tamin’ny teny vavolombelonao aho.

¹⁵⁸Mijery ny mpivadika aho ka maharikoriko ahy ireny, dia ireo tsy nitandrina ny teninao.

¹⁵⁹Jereo ny fitiavako ny didinao! TOMPO ô, velomy aho araka ny famindramponao.

¹⁶⁰Fahamarinana no tontalin-kevitry ny teninao; ary mandrakizay ny fitsipikao marina rehetra.

¹⁶¹Nanenjika ahy tsy amin’antony ny mpanapaka, nefa ny teninao no atahoran’ny foko.

¹⁶²Faly aho noho ny teninao, tahaka ny mahazo babo be.

¹⁶³Halako ny lainga ka ataoko ho fahavetavetana; ny lalànanao no tiako.

¹⁶⁴Impito isanandro no iderako Anao noho ny fitsipikao marina.

¹⁶⁵Be fiadanana izay tia ny lalànanao ary tsy misy mahatafintohina azy.

¹⁶⁶Miandry ny famonjenao aho, TOMPO ô, ka mankatò ny didinao.

¹⁶⁷Mitandrina ny teny vavolombelonao ny fanahiko ka tiako indrindra izany.

¹⁶⁸Mitandrina ny didinao sy ny teny vavolombelonao aho, fa ny lalan-kalehako rehetra dia eo anatrehanao.

¹⁶⁹Aoka anie ho tonga eo anatrehanao ny fitarainako, TOMPO ô; omeo fahiratan-tsaina aho araka ny teninao.

¹⁷⁰Aoka anie ho tonga eo anatrehanao ny fifonako; afaho aho araka ny teninao.

¹⁷¹Aoka hiboiboika fiderana ny molotro, fa ampianarinao ahy ny didinao.

¹⁷²Hankalaza ny teninao ny lelako, fa marina ny didinao rehetra.

¹⁷³Aoka anie hamonjy ahy ny tananao, fa efa nifidy ny didinao aho.

¹⁷⁴Efa manina ny famonjenao aho, TOMPO ô, ary ny lalànanao no firavoravoako.

¹⁷⁵Aoka anie ho velona ny fanahiko ka hidera Anao ary aoka anie hamonjy ahy ny fitsaranao.

¹⁷⁶Efa nania aho; tadiavo toy ny fitady ondry very ny mpanomponao, fa tsy mba hadinoiko ny didinao.