Read La Bible en Malgache Salamo 132 Bible Online

Salamo 132 - La Bible en Malgache bible

Salamo 132

¹Hira fanao amin’ny fiakarana. TOMPO ô, tsarovy i Davida noho ny zavatra rehetra nanjo azy,

²tamin’ilay nianianany tamin’NY TOMPO sy nanaovany voady tamin’ny Maherin’i Jakoba hoe:

³Tsy mba hiditra ao an-daiko aho na hiakatra amin’ny farafara fandriako,

⁴tsy mba havelako hatory ny masoko, na ho rendrehana ny hodimasoko,

⁵mandra-pahitako fitoerana ho an’NY TOMPO, dia fonenana ho an’ny Maherin’i Jakoba.

⁶Indro, nandre azy tany Efrata isika; nahita azy tany an-tsahan’i Jara isika.

⁷Aoka hiditra any amin’ny fonenany isika ka hiankohoka eo amin’ny fitoeran-tongony.

⁸Mitsangàna, TOMPO ô, ho amin’ny fitsaharanao, dia Ianao sy ny vata misy ny Fanekena* misy ny herinao.

⁹Aoka ny mpisoronao hitafy fahamarinana ary aoka ny olonao masina hihoby.

¹⁰Noho ny amin’i Davida mpanomponao dia aza mampiala maina ny tavan’ny voahosotrao.

¹¹Efa nianiana marina tamin’i Davida NY TOMPO ka tsy hitsoahany izany: Ny ateraky ny kibonao no hapetrako eo ambonin’ny sezafiandriananao.

¹²Raha tandreman’ny zanakao ny fanekeko sy ny teny vavolombeloko izay hampianariko azy, dia ny zanany kosa no handimby tsy tapaka anao eo ambonin’ny sezafiandriananao.

¹³Fa NY TOMPO efa nifidy an’i Ziona* ary naniry azy ho fonenany.

¹⁴Ity, hoy Izy, no fitsaharako mandrakizay doria; eto no honenako fa efa niriko ity.

¹⁵Hotahiko tokoa ny fihinana ao; hovokisako hanina ny mahantra ao.

¹⁶Ny mpisorona ao dia hampitafiako famonjena ary hihoby tokoa ny olo-masina ao.

¹⁷Ao no hampitsimohako tandroka* ho an’i Davida sy hanamboarako jiro ho an’ny voahosotro.

¹⁸Hampitafiako henatra ny fahavalony; fa eo aminy kosa no hamirapiratra ny satroboninahiny.