Read La Bible en Malgache Salamo 135 Bible Online

Salamo 135 - La Bible en Malgache bible

Salamo 135

¹Haleloia*. Miderà ny anaran’NY TOMPO; miderà Azy, ianareo mpanompon’NY TOMPO,

²ianareo izay maharitra ao amin’ny tranon’NY TOMPO, ao anatin’ny kianjan’ny tranon’Andriamanitsika.

³Miderà NY TOMPO fa tsara Izy; mankalazà ny anarany fa mahafinaritra izany.

⁴Fa nofidin’NY TOMPO ho Azy i Jakoba ary ho rakitra soa ho Azy Israely.

⁵Fa fantatro fa lehibe NY TOMPO ary ambonin’ny andriamanitra rehetra ny Tompontsika.

⁶Manao izay sitrapony rehetra NY TOMPO, na any amin’ny lanitra, na etỳ ambonin’ny tany, na any amin’ny ranomasina sy ny rano lalina rehetra.

⁷Mampiakatra zavona avy amin’ny faran’ny tany Izy; manao tselatra arahin-dranonorana Izy; mamoaka ny rivotra avy ao amin’ny trano fitahirizany azy Izy.

⁸Izy no namely ny voalohan-terak’i Ejipta, na olona na biby.

⁹Nandefa famantarana sy fahagagana teo aminao Izy, ry Ejipta ô; eny, tamin’i Farao sy ny mpanompony rehetra,

¹⁰dia Ilay namely ny Jentilisa* maro ka nahafaty mpanjaka mahery,

¹¹dia i Sihona mpanjakan’ny Amorita sy i Oga mpanjakan’i Basana ary ny fanjakan’i Kanana rehetra;

¹²ary ny tanin’ireo dia nomeny ho lova; eny, ho lovan’ny Israely olony.

¹³TOMPO ô, mandrakizay ny anaranao; TOMPO ô, hihatra amin’ny taranaka fara aman-dimby ny fahatsiarovana Anao.

¹⁴Fa hanome rariny ny olony Izy ary hanenina ny amin’ny mpanompony.

¹⁵Ny sampin’ny Jentilisa dia volafotsy sy volamena, izay asa nataon’ny tanan’olombelona.

¹⁶Manam-bava izy nefa tsy miteny; mana-maso izy nefa tsy mahita;

¹⁷manan-tsofina izy nefa tsy mandre ary tsy misy fofonaina ao am-bavany.

¹⁸Ho tahaka azy izay manao azy sy izay rehetra matoky azy.

¹⁹Misaora NY TOMPO, ry taranak’Israely; misaora NY TOMPO, ry taranak’i Arona;

²⁰misaora NY TOMPO, ry taranak’i Levy; ianareo izay matahotra NY TOMPO, misaora NY TOMPO.

²¹Isaorana avy any Ziona* anie NY TOMPO izay monina any Jerosalema. Haleloia*.