Read La Bible en Malgache Salamo 139 Bible Online

Salamo 139 - La Bible en Malgache bible

Salamo 139

¹Ho an’ny mpiventy hira. Salamo nataon’i Davida. TOMPO ô, efa nandinika ahy Ianao ka mahalala ahy.

²Ianao no mahalala ahy na mipetraka aho na mitsangana sady mahafantatra ny hevitro eny lavitra eny.

³Voadinikao aho, na mandeha, na mandry, ary fantatrao tsara ny alehako rehetra.

⁴Fa indro TOMPO ô, tsy mbola eo amin’ny lelako akory ny teny dia efa fantatrao izy rehetra.

⁵Manodidina ahy ao aorianako sy eo alohako Ianao ary apetrakao amiko ny tananao.

⁶Fahalalana mahagaga ahy loatra izany; eny, avo loatra ka tsy takatro.

⁷Aiza no hialako amin’ny Fanahinao? Aiza no handosirako tsy ho eo anatrehanao?

⁸Na dia miakatra any an-danitra aza aho dia any Ianao; na dia manao ny fitoeran’ny maty* ho fandriako aza aho dia indro, any Ianao.

⁹Na dia maka ny elatry ny maraina mba honina any am-paran’ny ranomasina aza aho

¹⁰dia mbola entin’ny tananao ihany aho, na dia any aza, ary hazonin’ny tananao ankavanana.

¹¹Ary na dia hoy aho aza hoe: Aoka ny maizina hanarona ahy ary aoka ny mazava manodidina ahy ho tonga alina,

¹²tsia, fa ny maizina aza dia tsy mahamaizina Aminao, fa ny alina dia mahazava toy ny andro ihany ka sahala ny mazava sy ny maizina.

¹³Fa Ianao no nahary ny voako; namolavola ahy tao an-kibon’ny reniko Ianao.

¹⁴Midera Anao aho fa mahatahotra sy mahatalanjona ny fomba nanaovana ahy. Mahagaga ny asanao ary fantatry ny fanahiko marimarina izany.

¹⁵Tsy niafina Taminao ny momba ny tenako fony natao tao amin’ny miafina aho ka noforoninao hisy endrika tany ambanin’ny tany.

¹⁶Efa nahita ahy ny masonao na dia fony tsy mbola nisy endrika akory aza aho; voasoratra teo amin’ny bokinao avokoa ny andro voatendry, fony mbola tsy nisy na dia iray akory aza.

¹⁷Endre, tsy takatry ny saiko ny hevitrao, Andriamanitra ô! Akory ny hamaron’ny isany!

¹⁸Raha hanisa azy aho dia maro lavitra noho ny fasika ny isany; raha mifoha aho dia mbola eo Aminao ihany.

¹⁹Haringanao mihitsy anie ny ratsy fanahy, Andriamanitra ô! Mialà amiko, ianareo mpandatsa-dra.

²⁰Manonona Anao hoenti-mamitaka izy; eny, ny fahavalonao dia manonona Anao foana.

²¹Tsy hankahala izay mankahala Anao va aho, TOMPO ô, ary ho rikoriko amin’izay mitsangana hanohitra Anao?

²²Tena halako marina tokoa ireny; fahavaloko ireny.

²³Diniho aho, Andriamanitra ô, ary fantaro ny foko, zahao toetra aho ary fantaro ny eritreritro;

²⁴zahao na misy lalana mety ahitan-doza ato anatiko, dia tariho amin’ny lalana mandrakizay aho.