Read La Bible en Malgache Salamo 140 Bible Online

Salamo 140 - La Bible en Malgache bible

Salamo 140

¹Ho an’ny mpiventy hira. Salamo nataon’i Davida. TOMPO ô, afaho amin’ny olon-dratsy aho ary arovy amin’ny mpampihorohoro

²izay mikotrika hevi-dratsy ao am-pony ka manangana ady isanandro.

³Mandranitra ny lelany tahaka ny bibilava izy, ny poizin’ny menarana no ao ambanin’ny molony. Fiatoana.

⁴TOMPO ô, vonjeo amin’ny tanan’ny ratsy fanahy aho ary arovy amin’ny mpampihorohoro izay mihevitra handronjina ahy ho potraka.

⁵Ny mpiavonavona dia manafina fandrika sy kofehy hamandrihany ahy; manao vela-pandrika harato eo amoron-dalana izy; nametraka tadivavarana hahazoany ahy izy. Fiatoana.

⁶Hoy aho tamin’NY TOMPO: Andriamanitro Ianao; henoy ny feon’ny fifonako, TOMPO ô!

⁷TOMPO Andriamanitra ô, ry Herin’ny famonjena ahy, manarona ny lohako Ianao amin’ny andro fiadiana.

⁸TOMPO ô, aza omena ny ratsy fanahy izay iriny ary aza avela ho tanteraka ny hevi-dratsiny, fandrao hisandratra izy. Fiatoana.

⁹Ny lohan’izay manemitra ahy dia aoka hosaronan’ny ratsy tononin’ny molony.

¹⁰Aoka hisy vainafo halatsaka aminy; aoka hariana any anaty afo izy na any an-davaka lalina ka tsy hiarina intsony.

¹¹Tsy hampitoerina amin’ny tany ny olona mahay vava; henjehin-doza ny mpampihorohoro ka ho lavo.

¹²Fantatro fa NY TOMPO no handahatra ny tenin’ny ory sady hanome rariny ho an’ny mahantra.

¹³Eny tokoa, hisaotra ny anaranao ny marina; hitoetra eo anatrehanao ny mahitsy.