Read La Bible en Malgache Salamo 141 Bible Online

Salamo 141 - La Bible en Malgache bible

Salamo 141

¹Salamo nataon’i Davida. TOMPO ô, miantso Anao aho, faingàna hankaty amiko; henoy ny feoko amin’ny fiantsoako Anao.

²Aoka hankeo anatrehanao mandrakariva toy ny ditin-kazo manitra ny vavaka ataoko ary ho toy ny fanatitra hariva ny fanandratako ny tanako.

³TOMPO ô, asio fiambenana ny vavako; ambeno ny varavaran’ny molotro.

⁴Aza avela hirona ho amin’ny zava-dratsy ny foko hiray raharaha amin’ny olona mpanao ratsy ka hanao izay asa tsy mety, ary aoka tsy hihinana ny haniny matsiro aho.

⁵Aoka ny marina hamely ahy amin’ny fahalemem-panahy ka hananatra ahy, fa diloilo ahosotra ny lohako izany, ary aoka tsy handa izany ny lohako; fa ny hany heriko dia ny mbola hivavaka ihany noho ny faharatsian’ireny.

⁶Havarina amin’ny hantsam-bato ny mpitsara azy, dia hankasitraka ny teniko ny olona fa mamy izany.

⁷Toy ny fiasa sy ny fihevo ny tany no nanelezana ny taolanay teo am-bavan’ny fitoeran’ny maty*.

⁸Fa Ianao no andrandrain’ny masoko, TOMPO Andriamanitra ô; Ianao no ialofako, aza mandatsaka ny aiko.

⁹Arovy aho amin’ny fandrika amandrihany ahy sy amin’ny tadivavaran’ny mpanao ratsy.

¹⁰Aoka ho latsaka eo anatin’ny fandrika nataony ihany ny ratsy fanahy fa izaho kosa dia handalo fotsiny.