Read La Bible en Malgache Salamo 143 Bible Online

Salamo 143 - La Bible en Malgache bible

Salamo 143

¹Salamo nataon’i Davida. TOMPO ô, henoy ny vavaka ataoko ary atongilano amin’ny fifonako ny sofinao; valio araka ny teninao marina sy ny fahamarinanao aho.

²Aza dia mifandahatra amin’ny mpanomponao eo am-pitsarana fa tsy misy olombelona ho marina eo anatrehanao.

³Fa nanenjika ny fanahiko ny fahavalo; namely ny aiko ho lavo tamin’ny tany izy; nampitoeriny tao amin’ny maizina aho, toy izay efa maty ela.

⁴Dia reraka ny fanahiko ato anatiko; fadiranovana ny foko ato anatiko.

⁵Mahatsiaro ny andro fahiny aho ary misaina ny asanao rehetra; ny asan’ny tananao no eritreretiko.

⁶Manandra-tanana Aminao aho; ny fanahiko dia tahaka ny tany mangentana eo anatrehanao. Fiatoana.

⁷Faingàna hamaly ahy, TOMPO ô, fa reraka ny fanahiko. Aza manafina ny tavanao amiko, fandrao ho tahaka izay midina any am-pasana aho.

⁸Ampandreneso ny famindramponao aho nony maraina fa Ianao no itokiako. Ampahalalao ahy izay lalana tokony halehako fa Aminao no anandratako ny fanahiko.

⁹TOMPO ô, afaho amin’ny fahavaloko aho; ao Aminao no iereko.

¹⁰Ampianaro hanao ny sitraponao aho fa Ianao no Andriamanitro; aoka ny Fanahinao tsara no hitarihanao ahy amin’izay tany marina.

¹¹Noho ny anaranao, TOMPO ô, dia velomy aho; araka ny fahamarinanao dia avoahy ho afaka amin’ny fahoriana ny fanahiko.

¹²Ary araka ny famindramponao dia fongory ny fahavaloko ka aringano izay rehetra mampahory ny fanahiko fa mpanomponao aho.