Read La Bible en Malgache Salamo 145 Bible Online

Salamo 145 - La Bible en Malgache bible

Salamo 145

¹Fiderana nataon’i Davida. Hanandratra Anao aho, ry Andriamanitro Mpanjaka ô, ary hankalaza ny anaranao mandrakizay doria.

²Hankalaza Anao isanandro aho ary hidera ny anaranao mandrakizay doria.

³Lehibe NY TOMPO ka mendrika hoderaina indrindra; tsy takatry ny saina ny fahalehibiazany.

⁴Ny taranaka rehetra dia samy hidera ny asanao amin’izay mandimby azy sy hanambara ny asanao lehibe.

⁵Ny lazan’ny voninahitry ny fiandriananao sy ny asanao mahagaga no hosaintsainiko.

⁶Ny herin’ny asanao mahatahotra no hotenenin’ny olona ary ny fahalehibiazanao no hotantaraiko.

⁷Hanonona ny fahatsiarovana ny haben’ny fahatsaranao izy ary hihoby ny fahamarinanao.

⁸Mamindra fo sy miantra NY TOMPO, mahari-po sady be famindrampo Izy.

⁹Manisy soa ny rehetra NY TOMPO ary ny fiantrany dia eny amin’ny asany rehetra.

¹⁰TOMPO ô, midera Anao ny asanao rehetra ary misaotra Anao ny olonao masina.

¹¹Milaza ny voninahitry ny fanjakanao izy sady miresaka ny herinao

¹²mba hampahafantarana ny zanak’olombelona ny herinao sy ny haben’ny voninahitry ny fanjakanao.

¹³Fanjakana mandrakizay ny fanjakanao ary hihatra amin’ny taranaka fara aman-dimby ny fahefanao.

¹⁴NY TOMPO manohana izay rehetra lavo ary mampitraka izay rehetra mitanondrika.

¹⁵Ny mason’izao rehetra izao miandrandra Anao ary manome azy ny haniny amin’ny fotoanany Ianao.

¹⁶Manokatra ny tananao Ianao ka mahavoky soa ny zavamananaina rehetra.

¹⁷Marina NY TOMPO amin’ny lalany rehetra, sady mamindra fo amin’ny asany rehetra.

¹⁸NY TOMPO dia eo akaikin’izay rehetra miantso Azy, dia izay rehetra miantso Azy marina tokoa.

¹⁹Hanefa ny fanirian’izay matahotra Azy Izy ary hihaino ny fitarainany ka hamonjy azy.

²⁰Miaro izay rehetra tia Azy NY TOMPO, fa ny ratsy fanahy rehetra kosa dia haringany.

²¹Ny fiderana NY TOMPO no hotenenin’ny vavako; ary aoka hankalaza ny anarany masina mandrakizay doria ny nofo rehetra.