Read La Bible en Malgache Salamo 147 Bible Online

Salamo 147 - La Bible en Malgache bible

Salamo 147

¹Haleloia*, fa tsara ny mihira ho an’Andriamanitsika; eny, mamy sady mendrika ny fiderana.

²Manangana an’i Jerosalema NY TOMPO; mamory ny Israely voaroaka Izy.

³Manasitrana ny torotoro fo Izy ary mamehy ny feriny.

⁴Milaza ny isan’ny kintana Izy; samy tononiny amin’ny anarany avy ireny rehetra ireny.

⁵Lehibe ny Tompontsika sady be hery; tsy hita lany ny fahalalany.

⁶Manohana ny mpandefitra NY TOMPO, fa mampietry ny ratsy fanahy hatrany amin’ny tany.

⁷Mihirà fiderana ho an’NY TOMPO; mankalazà an’Andriamanitsika amin’ny lokanga.

⁸Izy no manaron-drahona ny lanitra, Izy no manamboatra ranonorana ho amin’ny tany, Izy no mampaniry ahitra ny tendrombohitra,

⁹Izy no manome hanina ho an’ny biby sy ho an’ny zana-goaika izay mitaraina.

¹⁰Tsy ny herin’ny soavaly no mahafinaritra Azy ary tsy ny ranjon’ny lehilahy no ankasitrahany.

¹¹Mankasitraka izay matahotra Azy NY TOMPO, dia izay manantena ny famindrampony.

¹²Mankalazà NY TOMPO, ry Jerosalema ô! Miderà an’Andriamanitrao, ry Ziona* ô.

¹³Fa manamafy ny hidim-bavahadinao Izy sady mitahy ny zanakao eo ampofoanao.

¹⁴Mahatonga ny faritaninao handry fahalemana Izy; vokisany vary tsara indrindra ianao.

¹⁵Mampandeha ny didiny ho amin’ny tany Izy; miely haingana be ny teniny.

¹⁶Mandatsaka orampanala tahaka ny volon’ondry Izy; mampiely fanala tahaka ny lavenona Izy.

¹⁷Mandatsaka ny havandrany tahaka ny sombintsombin-javatra Izy; iza no maharitra ny hatsiakany?

¹⁸Mamoaka ny teniny Izy ka mampiempo ireny; mampifofofofo ny rivony Izy dia mandriaka ny rano.

¹⁹Manambara ny teniny amin’i Jakoba Izy ary ny didiny sy ny fitsipiny amin’ny Israely.

²⁰Tsy nanao toy izany tamin’izay firenena hafa Izy ary ny fitsipiny dia tsy mba fantatr’ireny. Haleloia.