Read La Bible en Malgache Salamo 148 Bible Online

Salamo 148 - La Bible en Malgache bible

Salamo 148

¹Haleloia*. Miderà NY TOMPO avy any an-danitra, miderà Azy, ianareo any ambony.

²Miderà Azy, ry anjeliny rehetra; miderà Azy, ry miaramilany rehetra.

³Miderà Azy, ry masoandro amam-bolana; miderà Azy, ry kintana mazava rehetra.

⁴Miderà Azy, ry lanitry ny lanitra, ary ianareo rano any ambonin’ny lanitra.

⁵Aoka hidera ny anaran’NY TOMPO ireo, fa Izy no nandidy dia ary ireo.

⁶Nampitoetra ireo ho mandrakizay doria Izy; nomeny lalàna ireo ka tsy hihoatra izany.

⁷Miderà NY TOMPO avy etỳ an-tany. Ianareo dragona* sy ianareo rano lalina rehetra,

⁸ny afo sy ny havandra, ny orampanala sy ny zavona, ny rivotra mahery izay mankatò ny teniny,

⁹ny tendrombohitra sy ny havoana rehetra, ny hazo fihinam-boa sy ny sedera rehetra,

¹⁰ny bibidia sy ny biby fiompy rehetra, ny biby mandady na mikisaka ary ny voromanidina,

¹¹ny mpanjaka amin’ny tany sy ny vahoaka rehetra, ny mpitondra sy ny mpitsara rehetra amin’ny tany,

¹²na ny zatovolahy na ny zatovovavy, na ny antitra na ny tanora,

¹³samia midera ny anaran’NY TOMPO avokoa fa ny anarany ihany no misandratra; ambonin’ny tany sy ny lanitra ny voninahiny.

¹⁴Ary manandratra tandroka* ho an’ny olony Izy, dia fiderana ho an’ny olony masina rehetra; eny, ho an’ny Zanak’Israely, firenena akaiky Azy. Haleloia.