Read La Bible en Malgache Salamo 17 Bible Online

Salamo 17 - La Bible en Malgache bible

Salamo 17

¹Vavaka nataon’i Davida. TOMPO ô, mihainoa ny rariny, henoy ny fitarainako! Atongilano ny sofinao hihaino ny vavaka ataoko avy amin’ny molotra tsy misy fitaka!

²Aoka hivoaka avy eo anatrehanao ny fitsarana ahy ka hijery marina ny masonao.

³Nizaha toetra ny foko Ianao sady namantatra ahy nony alina; nizaha toetra ahy Ianao nefa tsy nahita na inona na inona: Tsy naloaky ny vavako izay zavatra nosainiko.

⁴Ny amin’ny asan’ny olona dia araka ny tenin’ny molotrao no nitandremako tsy ho amin’ny lalan’ny mpanao an-keriny;

⁵mafy orina eo amin’ny lalanao ny diako, tsy solafaka ny tongotro.

⁶Miantso Anao aho satria mamaly ahy Ianao, Andriamanitra ô. Atongilano amiko ny sofinao ka henoy ny teniko!

⁷Ataovy mahagaga ny famindramponao, Ianao izay mamonjy amin’ny tananao ankavanana ny olona mialoka Aminao mba tsy hahazoan’ny fahavalo azy.

⁸Arovy tahaka ny anakandriamaso aho, afeno ao ambanin’ny aloky ny elatrao

⁹mba tsy ho azon’ny ratsy fanahy izay mampahory ahy, dia ny fahavaloko masiaka izay manodidina ahy:

¹⁰Mihidy ao anatin’ny taviny izy, teny miavonavona no aloaky ny vavany.

¹¹Manara-dia anay sady manodidina anay izy ary mikendry ny hamotraka anay amin’ny tany.

¹²Ny fijery azy dia tahaka ny liona noana ta hamiravira, tahaka ny liona tanora mamitsaka ao am-pierena.

¹³Mitsangàna, TOMPO ô, sakano izy, aripaho izy! Vonjeo amin’ny sabatrao aho mba tsy ho azon’ny ratsy fanahy;

¹⁴vonjeo amin’ny tananao aho, TOMPO ô, mba tsy ho azon’ny olon’izao tontolo izao! Ny anjarany dia amin’izao fiainana izao, sady fenoinao ny harenanao ny kibony ka vokin’izany ny zanany sady mamela ny fananany be ho an’ny zanany madinika izy.

¹⁵Fa izaho kosa dia aoka hahita ny tavanao amin’ny fahamarinana; aoka ny endrikao no hahafapo ahy raha mifoha.