Read La Bible en Malgache Salamo 18 Bible Online

Salamo 18 - La Bible en Malgache bible

Salamo 18

¹Ho an’ny mpiventy hira. Salamo nataon’i Davida, mpanompon’NY TOMPO, izay nilaza tamin’NY TOMPO ny tonon’ity hira ity tamin’ny andro namonjen’NY TOMPO azy tamin’ny tanan’ny fahavalony rehetra, indrindra fa tamin’ny tanan’i Saoly. Hoy izy: Mamiko indrindra Ianao, RY TOMPO heriko ô!

²NY TOMPO no harambatoko sy manda fiarovana ho ahy ary Mpamonjy ahy, Andriamanitro, vatolampy ialofako, ampingako ary tandroka* famonjena ahy sy fiarovana avo ho ahy.

³Miantso fiderana NY TOMPO aho dia vonjena ho afaka amin’ny fahavaloko.

⁴Nihodidina tamiko ny famatoran’ny fahafatesana ary nampahatahotra ahy ny riaky ny fahalevonana;

⁵nihodidina tamiko ny famatoran’ny fitoeran’ny maty* ary nisakana ahy ny fandriky ny fahafatesana.

⁶Fony azom-pahoriana aho dia niantso NY TOMPO; eny, Andriamanitro no nitarainako; nihaino ny feoko tao an-tempoliny Izy ary tonga teo an-tsofiny ny fitarainako teo anatrehany.

⁷Dia nihozongozona sy nihorohoro ny tany ary nihorohoro ny fanambanin’ny tendrombohitra; eny, nihozongozona ireo satria tezitra NY TOMPO.

⁸Nisy setroka nisavoana teo am-bavorony ary afo mandevona avy teo am-bavany ka nisy vainafo nidedadeda avy aminy.

⁹Dia naondriny ny lanitra ka nidina Izy ary haizim-pito no teo ambanin’ny tongony.

¹⁰Nitaingina kerobima* Izy ka nanidina; eny, nanidina haingana tamin’ny elatry ny rivotra Izy.

¹¹Nanao ny maizina ho fiereny sy ho tranony manodidina Azy Izy, dia rano lalina ngalingaly sy rahona matevina.

¹²Ary teo amin’ny famirapiratana teo anoloany dia nandalo ny rahony matevina, ny havandra sy ny vainafo koa!

¹³Dia nampikotroka tany an-danitra NY TOMPO, niloa-peo tamin’ny havandra sy ny vainafo ny Avo Indrindra

¹⁴Dia nandefa ny zana-tsipìkany Izy ka nampiely ny fahavaloko ary nampandeha tselatra be ka nampifanaritaka azy.

¹⁵Dia niseho ny masondrano ary afa-tsarona ny fanambanin’ny tany noho ny teny mafy nataonao, TOMPO ô, noho ny fifofofofon’ny fofonain’ny vavoronao.

¹⁶Nanatsotra ny tanany avy tany ambony Izy ka nandray ahy, nanintona ahy niala tamin’ny ranobe Izy;

¹⁷nanafaka ahy tamin’ny fahavaloko mahery sy tamin’izay nankahala ahy Izy satria mahery noho izaho ireny.

¹⁸Nisakana ahy ireny tamin’ny andro nahitako loza, nefa NY TOMPO no Mpanohana ahy.

¹⁹Nitondra ahy ho any amin’ny malalaka Izy; nanafaka ahy Izy satria tiany aho.

²⁰Nanisy soa ahy araka ny fahamarinako NY TOMPO; araka ny fahadiovan’ny tanako no namaliany ahy;

²¹fa nitandrina ny lalan’NY TOMPO aho ary tsy mba nanao ratsy hanalavirana an’Andriamanitro.

²²Ny fitsipiny rehetra dia teo anatrehako ary ny lalànany dia tsy mba nampialaiko tamiko.

²³Tsy nanan-tsiny Taminy aho sady niaro tena tsy ho azon’ny fahotana.

²⁴Koa namaly ahy araka ny fahamarinako NY TOMPO, araka ny fahadiovan’ny tanako teo imasony.

²⁵Amin’ny olona mahatoky no isehoanao fa mahatoky, amin’ny tena olona marina no isehoanao fa marina,

²⁶amin’ny olona madio no isehoanao fa madio ary amin’ny mpiolakolaka kosa no isehoanao fa lalin-tsaina.

²⁷Fa Ianao no mamonjy ny olona ory ary ny mason’ny mpianjonanjona kosa dia aetrinao.

²⁸Fa Ianao no mampirehitra ny jiroko; NY TOMPO Andriamanitro no mampahazava ny fahamaizinako.

²⁹Fa Ianao no ahazoako mihazakazaka hamely ny miaramila iray toko ary Andriamanitro no ahazoako mitsambikina mihoatra ny manda.

³⁰Raha ny amin’Andriamanitra dia tsy manan-tsiny ny lalany; voazaha toetra ny tenin’NY TOMPO; NY TOMPO no ampingan’izay rehetra mialoka Aminy.

³¹Fa iza no Andriamanitra afa-tsy NY TOMPO? Iza no Vatolampy afa-tsy Andriamanitsika?

³²Izany Andriamanitra izany no mampisikina hery ahy ka tsy mampanan-tsiny ny alehako.

³³Manao ny tongotro ho tahaka ny an’ny dieravavy Izy ka mampitoetra ahy eo amin’ny havoana.

³⁴Mampianatra ny tanako hiady Izy ka mahay manenjana ny tsipìka varahina ny sandriko.

³⁵Manome ahy ny ampingan’ny famonjenao Ianao; ny tananao ankavanana no manohana ahy ary ny fahamoram-panahinao no mahalehibe ahy.

³⁶Halalahinao ny lalana hodiaviko ka tsy mangovitra ny hato-tongotro.

³⁷Manenjika ny fahavaloko aho ka mahatratra azy; tsy miverina aho raha tsy mahalany ritra azy.

³⁸Mamely mafy azy aho ka tsy afa-mitsangana izy; lavo eo ambanin’ny tongotro izy.

³⁹Mampisikina ahy hery hoenti-miady Ianao, alefitrao ho ambaniko izay mitsangana hamely ahy.

⁴⁰Ataonao miamboho ahy ny fahavaloko ka aringako izay mankahala ahy.

⁴¹Mitaraina izy nefa tsy misy mpamonjy. Miantso NY TOMPO izy nefa tsy mamaly azy Izy.

⁴²Torotoroiko madinika tahaka ny vovoka entin’ny rivotra izy; tahaka ny fanary fotaka eny an-dalambe no fanariako azy.

⁴³Mamonjy ahy amin’ny fifandiran’ny olona Ianao ary manandratra ahy ho lehiben’ny firenen-tsamihafa; ny firenena tsy fantatro aza dia manompo ahy.

⁴⁴Raha vao mahare ny lazako izy dia manoa ahy; mikoy ahy ny hafa firenena;

⁴⁵mihaketraka ny hafa firenena ka miala amin-kovitra avy ao amin’ny fiarovany mafy.

⁴⁶Velona NY TOMPO; isaorana anie ny Vatolampiko! Hasandratra anie Andriamanitry ny famonjena ahy,

⁴⁷dia Andriamanitra izay manao famaliana ho ahy ka mampanaiky ahy amin’ny firenena maro.

⁴⁸Mamonjy ahy amin’ny fahavaloko Ianao! Eny, manandratra ahy ho ambonin’izay mitsangana hanohitra ahy Ianao ary manafaka ahy amin’ny mpampihorohoro.

⁴⁹Koa izany no hiderako Anao eny amin’ny firenen-tsamihafa, TOMPO ô, ary hankalazako ny anaranao.

⁵⁰Manao famonjena lehibe ho an’ny mpanjaka voatendriny Izy ary mamindra fo amin’ny Voahosony*, dia amin’i Davida sy ny taranany mandrakizay.