Read La Bible en Malgache Salamo 19 Bible Online

Salamo 19 - La Bible en Malgache bible

Salamo 19

¹Ho an’ny mpiventy hira. Salamo nataon’i Davida. Ny lanitra dia mitory ny voninahitr’Andriamanitra ary ny habakabaka dia manambara ny asan’ny tanany.

²Ny andro dia samy miteny amin’ny andro mandimby azy ary ny alina dia samy manolo-pahalalana amin’ny alina mandimby azy.

³Tsy misy teny na fiteny miasa anefa sady tsy re koa izay feony.

⁴Efa lasa ho any amin’ny tany rehetra ny kofehy fandrefesany ary mihatra amin’ny faran’izao rehetra izao ny teniny; tany no nanaovany tranolay ho an’ny masoandro.

⁵Ny masoandro dia tahaka ny mpampaka-bady mivoaka avy ao amin’ny efitrano fatoriany, mifaly tahaka ny lehilahy matanjaka mihazakazaka amin’ny alehany izy.

⁶Avy any amin’ny faravodilanitra no fiposahany ary ny alehany dia hatrany amin’ny farany koa; tsy misy takona amin’ny hafanany.

⁷Tsy misy tsiny ny lalànan’NY TOMPO, mamelombelona ny fanahy; mahatoky ny teny vavolombelon’NY TOMPO, mahahendry ny tso-po.

⁸Mahitsy ny fitsipiky NY TOMPO, mahafaly ny fo; madio ny didin’NY TOMPO, mampahazava ny maso.

⁹Madio ny fahatahorana NY TOMPO, maharitra mandrakizay; marina ny fitsipiky NY TOMPO, eny, mahitsy avokoa.

¹⁰Irina noho ny volamena ireny, eny, noho ny volamena tsy miharo betsaka aza; mamy noho ny tantely, eny, noho ny tantely mitete avy amin’ny tohotra.

¹¹Ny mpanomponao dia hazavain’ireny ary misy valiny lehibe ho an’izay mitandrina azy ireny.

¹²Raha ny fahadisoana tsy nahy, iza re no mahalala izany? Ataovy tsy manan-tsiny aho ny amin’izay ota tsy fantatro.

¹³Arovy ny mpanomponao tsy ho azon’ny mpiavonavona; aoka tsy hanapaka ahy ireny! Dia ho marina aho ka tsy hanan-tsiny ny amin’izay fahadisoana lehibe.

¹⁴Aoka ny tenin’ny vavako sy ny fisainan’ny foko samy hankasitrahana eo imasonao, TOMPO ô, Vatolampiko sy Mpanavotra ahy!