Read La Bible en Malgache Salamo 22 Bible Online

Salamo 22 - La Bible en Malgache bible

Salamo 22

¹Ho an’ny mpiventy hira. Al-aielet-hashahar. Salamo nataon’i Davida. Andriamanitro ô, Andriamanitro ô, nahoana no dia nahafoy ahy Ianao? Lavitry ny famonjena ahy ny tenin’ny fitarainako.

²Andriamanitro ô, miantso aho nony andro nefa tsy mamaly Ianao; miantso aho nony alina nefa tsy mahita fiononana.

³Kanefa masina Ianao, ry mipetraka eo amin’ny fideràn’ny Israely.

⁴Ianao no nitokian’ny razanay; natoky izy ka nanafaka azy Ianao.

⁵Ianao no nitarainany ka afa-nandositra izy; Ianao no nitokiany ka tsy nitsanga-menatra izy.

⁶Fa izaho dia olitra fa tsy olona, fandatsan’olona sy fanevatevam-bahoaka.

⁷Izay rehetra mahita ahy dia manaraby ahy, manondro molotra izy sady mihifikifi-doha ka miteny hoe:

⁸Efa niankina tamin’NY TOMPO izy, dia aoka Izy hamonjy azy; eny, aoka Izy hanafaka azy, satria mankasitraka azy Izy!

⁹Fa Ianao no nampivoaka ahy avy tao an-kibo; nampandry ahy fehizay Ianao, fony aho mbola nampinonoin’ny reniko;

¹⁰nankinina Taminao hatrany am-bohoka aho; hatrany an-kibon-dreniko dia Andriamanitro Ianao.

¹¹Aza manalavitra ahy Ianao fa akaiky ny fahoriana sady tsy misy olona hamonjy ahy.

¹²Mitangorona amiko ireo ombilahy maro, manemitra ahy ny maherin’i Basana.

¹³Misanasana vava amiko izy; eny, toy ny liona mamiravira sy mierona izy.

¹⁴Efa toy ny rano aidina aho ka mivaha ny taolako rehetra; tahaka ny savoka ny foko, miempo ato anatiko izy.

¹⁵Maina tahaka ny tanimanga vakivaky ny heriko ary miraikitra amin’ny lanilaniko ny lelako; ao amin’ny vovoky ny fahafatesana no ametrahanao ahy.

¹⁶Fa mitangorona amiko ny amboa, manemitra ahy ny andian’olon-dratsy, manindrona ny tongotro aman-tanako izy.

¹⁷Maha isa ny taolako rehetra aho. Mibanjina sady mangarika ahy ireo.

¹⁸Mizara ny fitafiako ho azy izy ary anaovany antsapaka ny akanjoko.

¹⁹Fa Ianao TOMPO ô, aza manalavitra; ry heriko ô, faingàna hamonjy ahy!

²⁰Afaho amin’ny sabatra aho, vonjeo amin’ny herin’ny amboa ny aiko!

²¹Afaho amin’ny vavan’ny liona sy amin’ny tandroky ny ombimanga aho! Dia namaly ahy Ianao!

²²Hitory ny anaranao amin’ny rahalahiko aho, eo afovoan’ny fiangonana no hiderako Anao.

²³Ianareo izay matahotra NY TOMPO, miderà Azy! Ry taranak’i Jakoba rehetra, omeo voninahitra Azy! Matahora Azy, ry Zanak’Israely rehetra!

²⁴Fa tsy manao tsinontsinona na marikorikon’ny fahorian’ny ory Izy ary tsy mba manafina ny tavany aminy; fa raha mitaraina Aminy ireny dia mihaino Izy.

²⁵Avy Aminao no ahazoako manao fiderana eo amin’ny fiangonan-dehibe; ny voadiko dia hefaiko eo anatrehan’izay matahotra NY TOMPO.

²⁶Hihinana ny mpandefitra ka ho voky; hidera NY TOMPO ireo izay mitady Azy. Ho velona mandrakizay anie ny fonareo!

²⁷Hahatsiaro NY TOMPO ny any amin’ny faran’ny tany rehetra ka hiverina Aminy; hiankohoka eo anatrehany ny fokon’ny firenen-tsamihafa.

²⁸Fa an’NY TOMPO ny fanjakana; manapaka ny firenen-tsamihafa Izy.

²⁹Hihinana sy hiankohoka koa ny mpanefoefo rehetra ambonin’ny tany; eo anatrehany no hiondrehan’izay rehetra midina any amin’ny vovoka, dia ireo izay tsy mahavelona ny ainy.

³⁰Hisy taranaka hanompo Azy ary ny Tompo dia holazaina amin’ny taranaka ho avy.

³¹Hisy ho avy ka hanambara ny fahamarinany amin’ny olona izay mbola hateraka fa Izy no nanao izany.